Ikipe y’umupira w’amaboko Gisagara Volleyball Club yamaze kwemeza ko itazitabira irushanwa ryo gushimira abasora neza ryiswe “Tax Payers Appreciation Volleyball Tournament” kubera kubura abakinnyi.
Ni irushanwa rigiye kuba ku nshuro yaryo ya gatatu,bikaba biteganijwe ko rizatangira mu mpera z’iki cyumweru kuwa 11 na 12 Ugushyingo 2023, muri BK Arena.
Nk’uko bitangazwa ngo Gisagara VC iheruka kwegukana Igikombe cya Shampiyona mu cyumweru gishize yikuye muri iri rushanwa nyuma yo kubura abakinnyi bayo b’imena dore ko inkingi za mwamba zerekeje mu yandi makipe.
Abo bakinnyi barimo Muvara Ronald na Ndayisaba Sylvestre berekeje muri REG VC na Niyonshima Samuel wagiye muri APR VC.
Biravugwa ko kandi Niyogisubizo Samuel uzwi nka Tyson na we yavuye muri iyi kipe by’umwihariko n’umutoza wayo Yakan Guma Lawrence akaba yaragiye nyuma yo kubona ikipe isa nk’isenyutse.
Irushanwa ry’uyu mwaka rigiye gukinwa ridafite abakinnye umukino wa nyuma aho REG VC yaryegukanye itsinze Gisagara VC amaseti 3-1.
Kugeza ubu amakipe azaryitabira ni APR VC, Police VC, Kepler VC na East African University Rwanda mu cyiciro cy’Abagabo mu gihe mu Bagore hazitabira RRA, APR, Police, IPRC Kigali na Ruhango WVC.
Ikipe ya mbere muri buri cyiciro izahabwa miliyoni 2 Frw, iya kabiri ihabwe miliyoni 1,5 Frw mu gihe iya gatatu izatsindira miliyoni 1 Frw.
Insanganyamatsiko y’uyu mwaka mu kwezi ko gushimira abasora ku nshuro ya 21, igira iti “Saba fagitire ya EBM, Wubake u Rwanda.”
Gisagara ivuye muri iri rushanwa mu gihe yari imwe mu makipe amze iminsi ahahamura abantu, ndetse irushanwa yinjiyemo bamwe bakaba bahitaga bikanga kuko bari babaziho ubuhanga buhambaye.
Yves Umuhoza
Rwanda Tribune.com
