Abaturage baturiye umupaka ugabanya Repubulika Iharanira Demokarasi ya Congo hamwe n’u Burundi, bavuga ko babonye ingabo z’u Burundi zambuka umupaka zijya muri Congo.

Bavuga ko babonye izi nyeshyamba zambuka ikiyaga cya Tanganyika no mu kibaya cy’uruzi rwa Rusizi, bityo ko nta banga abasirikare b’u Burundi binjiye muri Congo aho bagiye guhangana n’inyeshyamba za Red-Tabbara.

Nk’uko bitangazwa n’ikinyamakuru Sosmedias/Burundi ngo aba basirikare bari bambaye impuzankano z’abasirikare b’u Burundi, bavuga ikirundi, ngo bakaba bagiye bambutswa n’ubwato buto, bati “Baje baciye mu kiyaga cya Tanganyika muri iyi minsi tatu”.

Abaturage bo mu gace ka Makobola, teritwari ya Fizi bemeza ko aba basirikare b’u Burundi bari bafite intwaro ziremereye, bigaragara ko bambariye urugamba.

Baciye i Makobola ngo bakomeza bajya mu misozi miremire ya Kito na Kilingi, muri gurupoma ya Kalungwe, Teritwari ya Uvira, muri Kivu y’Amajyepfo.

Abandi bahaye amakuru iki kinyamakuru bemeza ko babonye umurongo w’abasirikare b’u Burundi, bavugaga ikirundi mu gace ka Kazima na Swima, berekeza ku musozi wa Lusolo.

Intego y’aba basirikare binjiye mu gihugu cy’abandi, ngo ni uguhashya umutwe w’inyeshyamba za Red-Tabbara zirwanya Leta y’u Burundi. Izi nyeshyamba zikaba zikambitse muri teritwari ya Mwenga.

Umwe mu bayobozi b’ingabo mu Burundi iki kinyamakuru kitatangaje amazina, ngo yagihakaniye aya makuru, avuga ko nta ngabo z’u Burundi zinjiye muri Congo.

Aho ngo yagize ati “Baturutse mu nkambi y’impunzi z’Abarundi muri Tanzania, bakaba bifuza kwiyunga kuri bagenzi babo muri Congo, kubera ubwoba batewe no gucyurwa mu Burundi ku ngufu mu kwezi gutaha”.

Gusa ku ruhande rw’inyeshyamba za Red-Tabara ntacyo zari zabitangazaho.

Ivomo: Bwiza.com

Ubwanditsi