Victoire Ingabire Umuhoza yeguye aranasezera muri FDU INKINGI ahita ashinga irindi shyaka”riharanira iterambere n’ubwisanzure kuri bose DALFA UMURINZI “
Madame Victoire Ingabire yashinze irindi shyaka DALFA UMURINZI
Amakuru agera kuri Rwanda tribune.com, aravuga ko Madame Victoire Ingabire uherutse guhabwa imbabazi n’umukuru w’igihugu cy’u Rwanda Nyakubahwa Paul Kagame, yasezeye mu ishyaka ritaremerwa mu Rwanda FDU INKINGI ahita ashyinga irindi ryitwa DALFA UMURINZI akaba ari ishyaka riharanira iterambere na Demokarasi.
Mu Kiganiro yagiranye n’ijwi ry’Amerika dukesha iyi nkuru yavuze ko yasanze FDU INKINGI itagifite intumbero y’igihe uRwanda rugezemo,cyane ko rikorera hanze ridashobora kubahiriza amahame amashyaka ari mu Rwanda agenderaho,yavuze kandi ko mu gihe ishyaka rye ryakwandikwa ryagendera ku mategeko agenga amashyaka mu Rwanda agenderaho,abajijwe niba Ishyaka rizakorana na P5,yahakaniye Radiyo Ijwi ry’Amerika ko atazakorana na P5.
Abakurikinira hafi ibya politiki basanga Victoire Ingabire Umuhoza yaba ari gukwepa ibirego amaze iminsi ahatwa na RIB bijyanye n’abarwanyi ba P5 bamaze iminsi bateza umutekano muke mu Rwanda uhereye ku bitero byagabwe mu Karere ka Musanze bigahitana abaturage 14.
Ndetse no muri Congo Kinshasa aho Ishyaka yari ayoboye ryatunzwe agatoki n’impuguke z’Akanama gashinzwe umutekano k’Umuryango w’abibumbye.
Hakiyongeraho n’igitutu amaze yotswa n’Umuryango wa Ben Rutabana umushinja ko we na Kayumba Nyamwasa bafashe bugwate Ben Rutabana mu gihugu cya Uganda aho basanzwe bakorera ibikorwa bya gisilikare bafatanyije na CMI.
Umwe mu basesenguzi mu bya politiki we asanga kuba Victoire Ingabire yaba ari gutegura urugendo rwe rwo kuziyamamaza muri 2024, mu kiganiro aherutse kugirana n’umunyamakuru Ruud Elmendorp w’Ijwi ry’Amerika yashimangiye ko yiteguye gutanga Kandidatire ye mu mwaka wa 2024.
Bamwe mu banyamategeko baganiriye na Rwandatribune.com basanga Politiki ya Ingabire Victoire iri mu nzira y’inzitane cyane ko imbere ye hakiri urukuta rw’amategeko haba mu gushinga Ishyaka cyangwa gutanga Kandidatire kuko yakatiwe igifungo kiri hejuru y’amezi 6.
Itegeko Ngenga rigenga amatora mu Rwanda N° 001/2019.OL ryo ku wa 29/07/2019, mu ngingo yaryo ya 21, cyane cyane Ingingo ya 81, isobanura neza mu gace kayo ka 8 ko muri kimwe mu bisabwa umukandida wiyamamariza ku mwanya wa Perezida wa Repubulika; agomba kwerekana icyemezo cy’uko atakatiwe n’inkiko igifungo kiri hejuru y’amezi 6.
Iyi rero akaba ari imbogamizi ikomeye yatuma Ingabire Victoire Kandidatire ye itakirwa. Gusohoka muri FDU INKINGI kwa Victoire Ingabire kandi kurerekana ko iri Shyaka yari yarashinze ryaba rigeze ku ndunduro ryisenya.
Mwizerwa Ally
