Urwego rw’Abanyamakuru bigenzura rwatangaje ko umunyamakuru Uwimana Nkusi Agnes wari nyiri ikinyamakuru Umurabyo yarusubije ku bushake ikarita imwemerera gukorera itangazamakuru ku butaka bw’u Rwanda.
Itangazo RMC yashyize hanze kuri uyu wa Kabiri tariki 14 Nzeri 2021, rivuga ko nyuma yo gusubiza ikarita yari yarahawe, Uwimana Agnes atakiri umunyamakuru w’umwuga wemerewe gukorera itangazamakuru mu Rwanda.
Rigira riti “Madamu Uwimana Nkusi Agnes, yarwandikiye ibaruwa kuwa 13/09/2021 arusubiza ku bushake ikarita N° 14/168-63 yo gukora umwuga w’itangazamakuru yari yarahawe n’uru rwego tariki 02/08/2021.”
Itangazo rikomeza rigira riti “RMC iramenyesha ko Madamu Uwimana Nkusi Agnes atakiri umunyamakuru w’umwuga wemerewe gukora itangazamakuru mu Rwanda nk’uko yari yarabiherewe uburenganzira na Rwanda Media Commission.”
Uwimana aretse itangazamakuru nyuma y’iminsi hari amajwi menshi asaba ko yakurikiranwa n’ubutabera, aho bamushinja kwihisha inyuma y’itangazamakuru agakwirakwiza imvugo zipfobya Jenoside yakorewe Abatutsi, ndetse n’izibiba urwango ahanini yifashishije imiyoboro ya YouTube.
Muri Gicurasi uyu mwaka, Umuryango w’Abanyarwanda biyemeje kurwanya abahakana n’abapfobya Jenoside, [Umurinzi Initiative] wahamagariye Abanyarwanda gusinya ku nyandiko isaba inzego z’ubutabera gukurikirana Uzaramba Aimable Karasira n’umunyamakuru Agnès Uwimana Nkusi ku byaha byo gupfobya Jenoside.
Uyu muryango uyoborwa na Ingabire Marie Immaculée nka Perezida wawo bahagamagariye abantu gusinya intabaza [petition] nyuma yo kubona ko abarimo Uwimana Agnes n’abandi bakomeje gukora ibikorwa babona ko bigize ibyaha by’ingengabitekerezo ya Jenoside, gupfobya no guhakana Jenoside yakorewe Abatutsi.
Mu mwaka wa 2010 Uwimana Nkusi Agnes yafashwe ashinjwa ibyaha byo gusebya Umukuru w’Igihugu no guhungabanya umudendezo w’igihugu, aza no guhamwa nabyo ndetse abifungirwa imyaka ine.
