Abaturage batuye imisozi ya Kagazi na Rusiga muri Komine Rugombo y’intara ya Cibitoke bivuganye abasore 3 b’Imbonerakure bambaye imyambaro ya Polisi n’igisirikare bavuga ko babafatiye mu mirima yabo biba inyanya n’ibitoki.
Ikinyamakuru SOS Media Burundi cyanditse ko izi Mbonerakure zishwe n’inkoni zahaswe n’abaturage. Muri aba bapfuye barimo Jacques Sindimwo na Fabrice Ndayisenga bafatiwe mu murima w’inyanya i Kagazi . Hari kandi na Manirampa wihimba Ninja we wafatanywe igitoki mu gace ka Rusiga.
Ubuyobozi bw’Intara ya Cibitoke bwenenze iki gikorwa cyo kwihanira cyakozwe n’abaturage , ndetse bunemeza ko abagize uruhare muri ubu bwicanyi bagomba kubihanirwa.
Umwe mu bibwe yabwiye SOS Media ko aba bishwe bari basanzwe bambara impuzankano ya Polisi n’igisirikare mu kwambura abantu benshi muri ako gace.
Yagize ati:”Aba bagabo bishwe bari basanzwe biba bambaye imyambaro ya Polisi n’iya gisirikare”
Uyu muturage yakomeje avuga ko Leta ikwiriye gukuraho umuco wo kudahana, cyane cyane ku rubyiruko rw’ishyaka CNDD FDD rya Perezida Ndayishimiye bashinja guhungabanya umutekano w’abaturage no kubacyuza utwabo.
Imbonerakure ni itsinda rikora nk’urwego rwunganira abashinzwe umutekano mu Burundi. Abarigize ,abenshi ni abakorerabushake b’urubyiruko bakuwe mu ishyaka CNDD FDD riri ku butegetsi.
