Mu mahangaNyamukuruUbuzima

Coronavirus: Mu Butaliyani abanduye bazamutse bagera kuri 400

Mu Butaliyani abanduye bazamutse bagera kuri 400

Umubare w’abantu bamaze kwandura ubwoko bushya bwa coronavirus bamaze kugera kuri 400 mu Butaliyani, mu gihe amahanga akomeje kugerageza kubuza ko iyi virusi ikomeza gukwirakwira.

Uko kwiyongera kw’abayanduye mu Butaliyani, ari ho zingiro ry’ubwandu bwayo ku mugabane w’Uburayi, kungana n’ikigero cya 25% mu masaha 24 ashize.

Ibihugu byinshi by’i Burayi byatangaje abantu ba mbere banduye iyo virusi bayikomoye mu Butaliyani.

Nanone ku munsi w’ejo ku wa gatatu, ishami ry’umuryango w’abibumbye ryita ku buzima (OMS/WHO) ryatangaje ku nshuro ya mbere ko coronavirus iri gukwirakwira mu buryo bwihuse cyane hanze y’Ubushinwa – igihugu yatangiriyemo.

Ku isi abantu barenga 80,000 bo mu bihugu bigera hafi kuri 40 bamaze kwandura ubu bwoko bushya bwa coronavirus bwatangiye mu kwezi kwa cumi na kabiri mu mwaka ushize. Umubare munini w’abayirwaye uracyari mu Bushinwa.

Indwara ya Covid-19 yo mu myanya y’ubuhumekero iterwa n’ubu bwoko bushya bwa coronavirus, imaze kwica abantu barenga 2,700 kugeza ubu.

Mu Butaliyani ibintu byifashe bite?

Mu ijoro ry’ejo ku wa gatatu, abategetsi batangaje ko umubare w’abamaze kwandura coronavirus ugeze kuri 400 – biyongereyeho 80 ku bari batangajwe mu ijoro ryo ku wa kabiri.

Uturere twibasiwe cyane ni utwiganjemo inganda mu majyaruguru y’igihugu – i Lombardy, mu nkengero z’umujyi wa Milan, n’i Veneto hafi y’umujyi wa Venice. Coronavirus kugeza ubu imaze kwica abantu 12 muri iki gihugu.

Abategetsi muri leta y’Ubutaliyani bagerageje guhumuriza abaturage, bashimangira ko hari ingamba ziri gufatwa mu kwirinda ko iyo virusi ikomeza gukwirakwira.

Gusohoka nijoro kumenyerewe cyane mu mujyi wa Milan kwashegeshwe na coronavirus

Amashuri, za kaminuza n’aho abantu barebera za filime hafunzwe ndetse n’ibikorwa byinshi byari guhuriramo abantu benshi biburizwamo.

Imijyi 11 yiganjemo iyo virusi – ituwe n’abantu 55,000 – yashyizwe mu kato.

Hari ubwoba bwuko cornavirus yatuma Ubutaliyani bugira ihungabana ry’ubukungu.

Umunyamakuru wa BBC, anariyo rwandatribune.com ikesha aya makuru Mark Lowen uri i Milan avuga ko ubwoba ari bwo bwatumye aho abantu basohokera ubu hambaye ubusa ndetse n’amahoteli menshi akaba yabaye afunze imiryango.

Stella Kyriakides, komiseri mu muryango w’ubumwe bw’Uburayi, yabwiye abanyamakuru nyuma yo guhura na minisitiri w’ubuzima w’Ubutaliyani mu mujyi wa Rome ati:

“Iki ni igihe giteye impungenge, ariko ntitugomba guta umutwe”.

“Haracyari ibintu byinshi tutazi kuri iyi virusi, by’umwihariko aho ituruka n’uko ikwirakwira”.

Ndacyayisenga Jerome

Soma Inkuru

Leave a Reply

Your email address will not be published. Required fields are marked *

Back to top button
Close