Inzira imwe rukumbi umunye-Congo asigaranye yo kugera ku mahoro ni ukuyoboka AFC_ Victor Tosonga

Abagize ishyaka Alliance Fleuve Congo, bahamagariye AbanyeCongo kwifatanya nabo mu guharanira uburenganzira bw’Abanyagihugu no kurwanya igitugu n’akarengane bikorwa n’ishyaka riri k’ubutegetsi rya Felix Tshisekedi .

Ibi byagaragaye mu butumwa byanyujijwe ku rukuta rwa X, ry’ umwe mu bagize iri shyaka witwa Victor Tosonga, aho yagize ati “Nta rindi shyaka rifite ejo hazaza heza h’igihugu cya Congo  usibye  irya  Alliance Fleuve du Congo (AFC)’’.

Yakomeje agira ati “Inzira umunye-Congo asigaranye yo kugera ku mahoro arambye ni imwe rukumbi, ni ukuyoboka AFC.”

Uyu munyapolitiki  kandi yasoje  avuga ko , umunyeCongo wese uzi ubwenge kandi utegereje ahazaza heza h’igihugu, adakwiriye kwizera ibyo CENI iri gutangaza,  kuko ari igikoresho cya Perezida Tshisekedi.

Ibi bibaye mu gihe AFC imaze  igihe yifatanyije n’umutwe w’inyeshyamba wa  M23 ndetse hakaba hari n’abasirikare bo mu Ngabo za Leta ya  Congo  FARDC zamaze kwihuza nabo.

Uyu mutwe w’inyeshyamba wa M23 umaze igihe uhanganye n’Ingabo za Leta ya  Congo FARDC uzishinja kwica no kwangiza imitungo y’abavuga ururimi rw’Ikinyarwanda.

Abatavuga rumwe na Leta ya Congo benshi  basa n’abihuje na M23 n’ubwo bitaragaragazwa k’uburyo bweruye.

Adeline Uwineza

Rwandatribune.Com