Uwahawe igihembo cy’amahoro kitiriwe Nobel, Dr Denis Mukwege uri mu bakomeye muri Repubulika Iharanira Demokarasi ya Congo, na we yamaganye ingabo ziri mu butumwa bwa EAC, avuga ko Igihugu kidashobora kurinda ikindi.
Inkundura yo kwamagana ingabo ziri mu butumwa bw’Umuryango wa Afurika y’Iburasirazuba, yafashe intera kuva mu cyumweru gishize, aho bamwe mu Banyekongo batangiye no kujya mu myigaragambyo yo kwamagana izi ngabo.
Iyi myigaragambyo yaje nyuma yuko bamwe mu banyapolitiki muri iki Gihugu bababasabye kwamagana izi ngabo za EAC.
Dr Denis Mukwege na we yinjiye mu bamagana izi ngabo, aho yavuze ko nta Gihugu gishobora kurindiria umutekano ikindi, ahubwo ko Congo yari ikwiye kubaka inzego z’umutekano zayo zikomeye.
Yagize ati “Igisubizo cyoroshye ni uko tugomba gushyira imbaraga mu kubaka umutekano wacu, ni ukuvuga ingabo, polisi n’inzego z’ubutasi.”
Uyu munyapolitiki kandi yavuze ko urubyiruko rw’Abanyekongo na rwo rukwiye gutegurwa kugira ngo rutange umusanzu warwo mu kurinda umutekano w’Igihugu.
RWANDATRIBUNE.COM
