Hashize igihe hagati ya Kayumba Nyamwasa na Noble Marara bose bahoze muri RDF ariko nyuma bakaza guhunga igihugu kubera gutinya gukurikiranwa n’ubutabera bwa gisirikare ku mpamvu zo kutuzuza inshingano zabo mugihe bari bakiri mu ngabo z’u Rwanda, hagaragara amakimbirane ,guhangana ,gusebanya ari nako baterana amagambo bya hato na hato.
Mu nyandiko zimaze igihe zandikwa na Noble Marara agaragaza Kayumba Nyamwasa nk’intare yakutse amenyo, umwesikoro muri politike nyarwanda yongeraho ko hejuru yibyo byose uyu mugabo yakunze kurangwa n’ubugambanyi.
Noble Marara akomeza avuga ko uwahoze ari jenerali ubu ari mu bwihisho bugereranwa nk’umwobo w’imbeba ayoboreramo ingirwashyaka RNC yahinduye umushinga ashakiramo amaramuko.
Benshi mu bantu bazi bano bagabo bombi bavuga, ko igikomeje gutuma Noble Marara ashira hanze Kayumba Nyamwasa ,ngo ari uko Kayumba Nyamwasa amaze iminsi ahugiye mu kinyoma cyo kumusebya muri Uganda aho Kayumba Nyamwasa aheruka kumugerekaho urusyo akagenda avuga ko Noble Marara na mwene wabo atavuze amazina ngo bafite aho bahuriye n’ibikorwa by’iterabwoba bimaze iminsi byibasiye umujyi wa Kampala.
Ibi ngo akabikora agamije guharabika Noble Marara muri Uganda dore ko abagize umutwe wa RNC hafi yabose bahagize akarima kabo ndetse ubu bakaba bameze nk’abari mu marushanwa kugirango buriwe se abe ariwe ugirirwa ikizere no kugaragara neza kwa Museveni
Ikindi cyatumye benshi bibaza ku mibanire y’aba bagabo bombi bose bavuga ko barwanya ubutegetsi bw’u Rwanda ni amagambo Noble Marara yongeyeho avuga ko ubwo Kayumba Nyamwasa yajyaga mu buhungiro yamwegeye akamusaba ko yamusinyira inyandiko bise “Affidavit “yari igamije gushinja ibinyoma abari bayoboye urugamba rwo kubohora u Rwanda guhera mu 1990-1994 ko aribo bahanuye indege ya Falcon 50 ya Habyarimana ngo akunde agaragarire neza Abafaransa ashaka kwiyunga nabo byanyirarureshwa maze ngo undi akamuhakanira.
Yagize ati:” Ubu rero nagirango n’abatari babizi bamenye ko nanze kugusinyira iryo shyano ngo ni Affidavit. Nanze kwirengera ibyaha byawe no kuguhekera ikinyoma”
Noble Marara arangiza avuga ko Kayumba Nyamwasa amaze igihe amuhigira hasi hejuru ashaka kumwirenza ariko Imana igakinga akaboko ngo kuberako yanze gushyigikira ikinyoma cye.
Twibutse ko n’ubwo bano bagabo bombi ubu barimo barebana ay’ingwe mu mwaka wa 2010 ubwo Kayumba Kyamwasa na bagenzi be barimo nyakwigendera Patrick Karegeya, Theogene Rudasingwa, Gahima Gerard n’abandi bashingaga umutwe w’iterabwoba wa RNC babanje gukorana, kuko Noble Marara wari warahunze mbere yabo yahise yifatanya nabo nawe aba uunyamuryango wa RNC ariko nyuma y’igihe gito yaje kwitandukanya nabo abashinja igitugu, kwikubira umutungo bakawukoresha mu nyungu zabo bwite, ubuswa no guhuzagurika muri politiki hakiyongeraho kutagira ikerekezo.
Kuva icyo gihe Kayumba Nyamwasa nawe yahise atangira kugenda abwira abayoboke ba RNC avuga ko Noble Marara yiyita umunyarwanda kandi ari Umugande ibuntu byababaje cyane Noble Marara maze nawe mukumusubiza avugako Kayumba Nyamwasa atariwe utanga ubunyarwanda, kugeza ubu aba bagabo bombi babarizwa mu mitwe irwanya ubutegetsi bw’u Rwanda bakaba bakomeje kurebana ayingwe.
Hategekimana claude
