Mu mahangaNyamukuruUmutekano

Somalia: Al-Shabab yigambye igitero ku ngabo z’umuryango w’ubumwe hapfamo abasirikare bane b’u Burundi

Al-Shabab yigambye igitero ku ngabo z'umuryango w'ubumwe hapfamo abasirikare bane b’u Burundi

Umutwe w’iterabwoba wa Al-shabab wigambye igitero ku ngabo z’umuryango w’ubumwe bwa Afurika ziri mu butumwa bwo kugarura amahoro muri Somalia uvuga ko cyaguyemo abasirikare bane b’u Burundi.

Uyu mutwe uravuga ko ejo kuwa kabiri wateze igisasu imodoka yari itwaye izi ngabo mu gace kitwa Burni, mu karere ka Muhaday mu ntara ya Middle Shabelle mu majyepfo ya Somalia.

Ubuyobozi bw’ingabo za AMISOM cyangwa ubw’ingabo z’u Burundi ntacyo buratangaza kuri iki gitero ku ngabo ziri mu butumwa bw’amahoro.

Ikigo cy’abanyemerika gikora ubushakashatsi ku makuru y’iterabwoba “Terrorism Research & Analysis Consortium” kiremeza ko iki gitero cyaguyemo abasirikare bane b’u Burundi.

Si ubwa mbere imodoka zirimo izi ngabo z’ubumwe bwa Afurika zitezwe ibisasu n’umutwe wa Al-shabab.

Mu minsi ishize imodoka y’ingabo za AMISOM yatezwe igisasu i Mogadishu bamwe bahasiga ubuzima.

Mu kwezi kwa cyenda umwaka ushize, abarwanyi ba Al-Shabab bateze igico bica abasirikare 14 b’u Burundi bari muri AMISOM.

Umuryango w’ubumwe bwa Afurika wamaganye iki gitero ku ngabo zagiye kugarura amahoro.

Mu kwezi kwa karindwi Al Shabab yagabye igitero ku ngabo za AMISOM mu karere ka Balad yica abasirikare batandatu b’u Burundi.

Ingabo za AMISOM zimaze igihe zisubiza ibirindiro bimwe ingabo za Leta ya Somalia zivuga aho zabashije kuhagarura amahoro.

Nubwo byitezwe ko mu 2021 ingabo za AMISOM zizava muri Somalia. Muri Somalia haracyari ibice byinshi bigenzurwa n’umutwe wa Al Shabab.

AMISOM igizwe n’ingabo zigera ku bihumbi 20, u Burundi bufitemo abagera ku 5,000.

Ndacyayisenga Jerome

Soma Inkuru

Leave a Reply

Your email address will not be published. Required fields are marked *

Back to top button
Close