Kuri uyu munsi w’amatora y’Umukuru w’Igihugu muri Uganda, hatangiye kugaragara ibibazo bica amarenga ko ibizayavamo bishobora kuzamo urunturuntu, aho tumwe mu dusanduku tw’itora twatangiye kubura.

NTV yatangaje ko kuri site y’itora ya Rushenyi iherereye mu Karere ka Ntungamo kari mu Burengerazuba bwa Uganda, agasanduku k’itora kabuze n’igikorwa nyir’izina kitararangira.

Ni amakuru yahamijwe n’Umuvugizi wa Komisiyo y’Amatora muri icyo gihugu, Paul Bukenya, avuga ko byamenyekanye bakaba basabye inzego zibishinzwe kubikurikirana.

Yagize ati “Icyo kibazo twakimenyeshejwe, ubu turi gukurikirana umuyobozi w’iyo site.”

Yakomeje avuga ko urwego rwa polisi ari rwo rugiye gukurikirana iby’icyo kibazo ako gasanduku kakagarurwa, ndetse hakarebwa uburyo bwakoreshwa ku buryo abaturage bo kuri iyo site bakomeza gutora.

Icyakora Bukenya yabyise amahirwe make kuko ari ikibazo kitari cyitezwe cyabangamiye amatora.

Amatora ari kuba muri Uganda kuri uyu wa Kane tariki 14 Mutarama ahanzwe amaso n’abatari bake, kubera ihangana rikomeye riri hagati ya Petrezida Museveni w’imyaka 76 ushaka manda ya gatandatu na Bobi Wine w’imyaka 39 ushaka kuzana impinduka mu miyoborere y’icyo gihugu.

Inzobere mu bya politiki zakunze kugaragaza impungenge ko aya matora ashobora kutazaba mu mucyo ndetse agateza imvururu, hashingiwe ku kuntu abashyigikiye Bobi Wine bakunze kwibasirwa n’inzego z’umutekano mu bihe bitandukanye, bamwe bakanahasiga ubuzima.

Aya matora yabaye mu gica n’icuraburindi risesuye kuko internet yafunzwe mu gihugu hose.