Byatangajwe na Prof Jean-Jeacques Muyembe ushinzwe ibikorwa byo kurwanya iki cyorezo muri Congo Kinshasa mu kiganiro n’abanyamakuru i Kinshasa.
Bwana Muyembe ntabwo yavuze umwirondoro cyangwa umujyi wabonetsemo uyu murwayi, gusa yavuze ko ari mu ntara ya Kivu ya ruguru.
Yavuze ko bari gukora iperereza ku hantu uyu murwayi yaba yaravanye iyi ndwara.
Intara ya Kivu ya ruguru ihana imbibi kandi ihahirana n’ibihugu by’u Rwanda na Uganda, ibihugu bimaze kugaragaramo iyi ndwara.
Hifashishijwe cyane cyane indege, umujyi wa Goma -uri muri iyi ntara – ugenderanira cyane n’uwa Kinshasa, ahamaze kubarurwa abarwaye coronavirus bagera kuri 50.
Congo Kinshasa ubu imaze kubonekamo abafite coronavirus 54, bane(4) yarabishe naho babiri (2) barayikize.
Kivu ya ruguru iheruka kwibasirwa n’icyorezo cya Ebola (1 Kanama 2018 – 2020) kishe abantu bagera ku 2,000 muri iyi ntara.
Leta ya DR Congo yatangaje ko kuva ejo kuwa gatandatu umujyi wa Kinshasa, ahiganje umubare munini w’abanduye, uzajya mu bihe bidasanzwe byo guhagarika ibikorwa byose mu gihe cy’ibyumweru bitatu.
Ivuga kandi ko ubu abantu hafi 2,000 bashyizwe mu kato kuko bahuye n’abarwayi ba coronavirus, nk’uko umunyamakuru wa BBC, Rwandatribune.com ikesha iyi nkuru uri i Kinshasa abivuga.
Mu gihe cy’ibihe bidasanzwe i Kinshasa, abantu bazajya bemererwa gusohoka mu ngo zabo kabiri mu cyumweru, bajye kugura ibiribwa n’ibindi bakeneye.
Abakozi batanga serivisi nkenerwa cyane nibo bazaba bemerewe gukomeza akazi kabo.
Ishami ry’umuryango w’abibumbye ryita ku buzima ku isi rivuga ko nubwo imibare y’abanduye Covid-19 ikomeza kwiyongera muri Afurika hari ikizere ko ishobora kudatumbagira cyane kubera ingamba zifatwa n’ibihugu.
Abantu 3,337 barwaye iyi ndwara muri Afurika kugeza ubu, abagera ku 187 yarabishe naho 90 barayikize.
Ndacyayisenga Jerome
