Intambara iri kubera mu gace ka Bishusha mu burasirazuba bwa Congo aho Gen.Ndaruhutse Dominique uyoboye Mai Mai Nyatura avuka, umutwe wa M23 ukaba wasakiranye na Nyatura/CMC FDP.
Isoko y’amakuru ya Rwandatribune iri mu gace ka Bwito ivuga ko imirwano yaramukiye muri Lokarite ya Bishusha, Sheferi ya Bwisha aho umutwe wa M23 uhanganye n’inyeshyamba za CMC/FDP Nyatura ya Gen.Ndaruhutse Dominique usanzwe uvuka muri ako gace.
Intandaro y’imirwano n’uko umutwe wa M23 watabajwe n’abaturage bavugaga ko aba Nyatura bateye uduce dutandukanye twa Bishusha na Gihondo bagasahura inka zirenga 2000.
Umutangabuhamya wavuganye na Rwandatribune uri Murimbi, avuga ko ubwo M23 yajyaga kugaruza izo nka habaye gusakirana mu rukerera n’inyeshyamba za Nyatura.
Umwe mu bayobozi ba Sosiyete Sivile yo muri ako gace utashatse ko amazina ye atangazwa avuga ko mu ma saa yine intambara yari ihoshoroye, ndetse inka zibwe M23 ikaba yazigaruje hakaba hari igikorwa cyo kuzisubiza bene zo.
Umwe mu basilikare ba M23 wo ku rwego rwa Ofisiye yabwiye isoko ya Rwandatribune ko abarwanyi bagera kuri 20 ba nyatura biciwe muri iyo mirwano.
Mwizerwa Ally
