Itangazo Ingabo za Leta Zunze Ubumwe za Amerika muri Afurika zasohoye rivuga ko Yusuf Jiis ari umwe mu byihebe bitatu byishwe ku wa Kane mu gitero cy’indege zagabye kuri abo barwanyi hafi ya Bush Madina mu gace ka Bay.
Jiis ngo yari umwe mu bashinze umutwe wa Al-Shabaab wigaruriye bimwe mu bice byo hagati no mu Majyepfo ya Somalia ukunze kugaba ibitero mu Murwa Mukuru Mogadishu.
Umuyobozi w’Ingabo za Amerika, Gen. Stephen Townsend, yavuze ko ubwo bari bagiye guhagarika ibikorwa kubera Coronavirus imitwe y’iterabwoba yavuze ko ari amahirwe kuri yo bituma batakibihagaritse.
Ati “Ubwo twari tugiye guhagarika ibikorwa byacu muri Somalia kubera Coronavirus, abayobozi ba Al-Qaida, al-Shabaab na ISIS batangaje ko babibonamo amahirwe kuri gahunda yabo y’iterabwoba. Ubwo rero tuzakomeza ibikorwa dufashe Afurika.”
Mu rindi tangazo Ingabo za Amerika zatangaje ko mu gitero cyo ku wa Mbere zishe abarwanyi batanu ba Al-Shabaab hafi ya Jilib. Izo ngabo zahakanye amakuru yavugaga ko ibitero byazo byahitanye n’abasivile.
Mwizerwa Ally
