Kutavuga rumwe ku kibazo cy’ingamba zigamije gukumira icyorezo cya Coronavirus hagati ya Perezida wa Leta Zunze Ubumwe za Amerika, Donald Trump na bamwe mu bayobozi ba Leta zigize iki gihugu bikomeje guteza umwuka mubi mu bayobozi n’abaturage muri rusange.
Kuri uyu wa Gatandatu, tariki ya 18 Mata 2020, mu bice bitandukanye byo muri Amerika haramukiye imyigaragambyo y’abaturage basaba ko gahunda ya ‘lockdown’ ikurwaho, ibikorwa bikongera gusubukurwa nk’uko byari bisanzwe.
Muri Leta za New Hampshire, Maryland na Texas ni ho hagaragaye umubare munini w’abigaragambya bagendaga n’amaguru abandi bari mu modoka zabo, basaba ko ingamba zo guhagarika ibikorwa hafi ya byose mu guhangana n’iki cyorezo zikurwaho.
Bamwe bavuga ko imibare y’abanduye n’abishwe na Coronavirus itangazwa ari ikinyoma. Abandi bavuga ko n’ubukene bushobora kubica kuko ntacyo bakinjiza mu gihe ibikorwa by’ubucuruzi hafi ya byose byahagaze, bityo ko batazubahiriza amabwiriza yashyizweho.
AFP yanditse ko mu bigaragambyaga hari harimo n’abafite intwaro, nubwo batazikoresheje cyangwa ngo bagire uwo basagarira.
Ku wa Gatanu, tariki ya 17 Mata 2020, Perezida Trump yasabye ba guverineri ba za leta zitandukanye gukuraho gahunda ya ‘lockdown’, ibikorwa by’ubucuruzi bikongera gusubukurwa, ubukungu bukazahuka.
Mu magambo ya Trump yanditse kuri Twitter, yagarutse by’umwihariko kuri leta za Michigan, Minnesota na Virginie ziyoborwa n’aba-Démocrates.
Ba guverineri b’izi leta zose bateye utwatsi ibyavuzwe na Trump, bakamushinja ko atitaye ku kibazo cy’icyorezo gikomeje guhitana abantu benshi, ahubwo ababajwe n’uko ubukungu bwasubiye inyuma mu gihugu hose.
Kuva hatangira gushyirwaho ingamba zikomeye zo gukumira ikwirakwira rya COVID-19 muri Leta Zunze Ubumwe za Amerika, abaturage barenga miliyoni 25 muri iki gihugu batakaje imirimo ya bo, bakaba bari gusaba leta kubaha ubufasha mu gihe badafite akazi.
Biteganyijwe ko ukwezi kwa Mata 2020 kuzarangira umubare w’abatagira akazi muri iki gihugu ugeze kuri 20% y’abaturage bose.
Mu gihe COVID-19 ikomeje guca ibice mu bayobizi n’abaturage muri Leta Zunze Ubumwe za Amerika, imibare yo kuri iki cyumweru, tariki ya 19 Mata 2020, igaragaza ko iki gihugu kimaze kugaragaramo abanduye basaga 738 920, abagera ku 39 015 bakaba barapfuye, mu gihe abakize bo ari 68 285.
Leta Zunze Ubumwe za Amerika ni cyo gihugu kiyoboye ibindi byose mu mibare y’abanduye n’abamaze kwicwa na COVID-19, ndetse ubwandu bukaba bukomeje kuzamuka umunsi ku wundi.
Hategekimana Jean Claude
