Abakandida barindwi bahatanira kuyobora igihugu cy’u Burundi ,abiyamamaza ku myanya w’abadepite ndetse n’abayobozi b’amakomini batangiye ibikorwa byo kwiyamamaza mu ntara zitandukanye.
Iki ni igikorwa kibafasha gushaka amajwi mu matora ateganyijwe kuya 20 Gicurasi 2020 aho abarundi bazatora umukuru w’igihugu,abadepite ndetse n’abayobozi b’amakomine.
Uku kwiyamamaza kubaye mu gihe muri iki gihugu hamaze kugaragara abantu 14 bamaze kwandura Covid19.
Mu kiganiro n’abanyamukuru uhagarariye komisiyo y’amatora CENI Pierre-Claver Kazihise yatangaje ko ibikorwa byo kwiyamamaza bitangira sakumi n’ebyiri z’igitondo bikarangira sakumi n’ebyiri z’umugoroba.
Bwana Kazihise yasabye abiyamamaza kubahiriza amategeko yashyizweho yo kwirinda Covid19 ndetse bubahiriza ubusugire n’umutekano w’abo bahanganye mu matora birinda amagambo asebanya.
Ku mwanya w’umukuru w’igihu hari Evariste Ndayishimiye w’ishyirahamwe CNDD-FDD,Agathon Rwasa w’ishyaka ritavuga rumwe n’ubutegetsi CNL,Gaston Sindimwo w’ishyaka UPRONA ndetse na Domitien Ndayizeye uhagarariye Urunani Kira Burundi.
Hari kandi n’abakandida bigenga aribo Francis Rohero hamwe na Dieudonné Nahimana.
Ubuyobozi bw’igihugu bwavuze ko icyorezo cya Covid19 kitazabuza gahunda zateganyijwe muri iki gihugu kuba by’umwihariko amatora ateganyijwe kuya 20 Gicurasi 2020.
Igihugu cy’u Burundi kiri mu bihugu byagezwemo na Covid19 bifite umwihariko wo gukomeza ibikorwa byacyo nta nkomyi mu gihe byinshi mu bihugu byagaragayemo iki cyorezo byagiye bifata ingamba zo kwirinda ikwirakwira ryacyo bisaba abaturage babyo kuguma mu rugo.
Ubuyobozi bw’iki gihugu butangaza ko amasengesho ariyo ntwaro ya mbere bazakoresha kandi ko Imana izabarinda kuko bayihaye umwanya udasanzwe mu buzima bwabo.
UMUKOBWA Aisha
