Umugore ukomoka mu Karere ka Kicukiro, Umurenge wa Kicukiro, Akagari ka Kagina, mu Mudugudu wa Iriba, basanze umurambo we mu rugo rw’umuvuzi gakondo.
Nyakwigendera yitwa Ingabire Christine w’imyaka 41 yaprifiye mu rugo rw’umuvuzi wa gakondo bikekwa ko yari yagiye kwaka ubufasha.
Umurambo we bawubonye kuri uyu wa gatandatu tariki 13 Kamena 2020 ahagana saa kumi n’ebyiri n’igice (18h30) mu rugo rw’umuvuzi gakondo utuye mu Karere ka Gicumbi, Umurenge wa Rwamiko, Akagari ka Nyagahinga, mu Mudugudu wa Kigaga.
Abaturage batangaza ko na bo batamenye neza urupfu rw’uyu mugore.
Nyuma yo gusanga umurambo wa Ingabire Christine mu rugo rw’uyu muvuzi wa gakondo witwa Urayeneza Perpetue, ubuyobozi bwawujyanye ku Bitaro bikuru bya Byumba.
Urayeneza Perpetue usanzwe ari Umuvuzi wa gakondo (hari abavuga Umuvuzi wa Gihanga) mu Murenge wa Rwamiko yatawe muri yombi n’Urwego rw’Ubugenzacyaha (RIB) ajyanwa kuri Sitayiyo ya Bukure.
Umunyamabanga Nshingwabikorwa w’Umurenge wa Rwamiko, Rusizana Joseph yabwiye Umuseke ko uyu muganga Urayeneza w’imyaka 49 y’amavuko nta byangombwa bimwemerera kuvura afite, bityo akaba yashyikirijwe RIB.
Ati “Njyewe kubera ko mpamaze igihe gito nari ntaramenya uyu muvuzi gakondo nk’uko babivuga, abaturage bavuze ko uwitabye Imana yaje kwivuza avuye i Kigali.”
Uyu muyobozi asaba abaturage kujya bivuriza ku Bigo Nderabuzima byemewe, cyangwa ku Bitaro.
Ni inkuru ya umuseke.com
