Ishami ry’umuryango w’abibumbye rishinzwe ubuzima ku isi OMS ryatangaje ko rishima intambwe yatewe mu igerageza ry’ibanze ry’umuti wa dexamethasone mu Bwongereza rigaragaza ko ushobora gukiza abantu barembye kubera Covid-19.
OMS yatangaje uyu muti ufasha gusa abarembejwe na Covid19.abakoze ubu bushakashatsi bavuga ko uyu muti ubasha gufasha abarwayi barembye bari kubyuma bibafasha guhumeka.
Umuti wa Dexamethasone ngo ntiwakoreshwa ku bafite ibimenyetso bya Covid19 byoroheje.
Aganira na BBC Dr Tedros Adhanom Ghebreyesus ukuriye OMS yagize ati: “Uyu ni wo muti wa mbere ugaragaje ko ugabanya impfu mu barwayi ba Covid-19 bakeneye umwuka n’ibyuma bibafasha guhumeka”.
Yongeyeho ati: “Iyi ni inkuru nziza kandi ndashimira leta y’Ubwongereza, Kaminuza ya Oxford, ibitaro n’abarwayi batanze umusanzu wabo ngo ibi bigerweho”.
Dexamethasone ni umuti wo mu bwoko bw’iyo bita steroid, watangiye gukoreshwa kuva mu myaka ya 1960 mu koroshya ‘inflammation’ (ugenekereje mu Kinyarwanda ni ukubabuka imbere mu mubiri) no kuri kanseri zimwe na zimwe.
Kuva mu 1977 OMS yawushyize ku rutonde rw’imiti y’ingenzi mu kuvura indwara nyinshi, ubu ni umiti wemewe gukorwa ku bwinshi kandi uboneka ku giciro giciriritse mu bihugu byinshi.
Abahanga mu by’imiti bavuga ko iba mu moko y’ibinini, umuti batera mu rushinge, umuti bisiga ku mubiri n’uwo batonyangiriza mu maso.
MWIZERWA Ally
