Twitege iki ku ngamba zishobora gufatwa n’Inama y’Abaminisitiri kuri Covid-19 ikomeje gukaza umurego?

Kuva kuwa 8 Werurwe 2020 u Rwanda rwatangaza umuntu wa mebere wanduye Covid-19, abantu bakomeje gupfa ari benshi mu gihe  abarembye nabo bakomeje kwiyongera mu bitaro umunsi ku munsi.

Imibare ya Minisiteri y’Ubuzima kuri Covid-19 kuva yagera Rwanda

Mu Rwanda hamazee gufatwa ibipimo 789,867,Ibi bipimo byafatiwe mu gihugu hose bigaragaza ko  mu Rwanda abamaze kwandura Covid-19 ari 11,032. Muri aba 142 bamaze guhitawa n’iki cyorezo naho abantu 7,363 bamaze kugikira naho abandi 3,527 baracyarwariye mu bitaro no mu ngo zitandukanye mu gihugu hose.

Guhera mu mpera z’Umwaka 2020, nibwo imibare y’abandura n’abahitanwa na Covid-19 yongeye kwiyongera, kuva icyo gihe kugeza ubu abarwayi biganjemo indembe bakomeje kwiyongera mu bitaro bitandukanye by’igihugu, naho abatararemba bamwe muri bo bavurirwa mu ngo zabo.

Ubwo RBA Iheruka gusura ahavurirwa indembe mu bitaro bya Kaminuza bya Kigali CHUK, basanze mu barwayi 82 baharwariye, 24 muri bo bari mu cyiciro cy’indembe naho abarwayi babiri gusa aribo bari ku mashini zibafasha guhumeka bizwi nka Ventilator.

Umujyi wa Kigali ukomeje kugaragaramo ubukana budasanzwe bw’icyorezo.

Imibare ya Minisiteri y’Ubuzima yerekana ko kuva ku wa 11 Mutarama kugeza ku wa 17 Mutarama 2021, muri Kigali honyine abantu 862 banduye Coronavirus mu gihe abo yahitanye ari 19.

No kuri iki cyumweru tariki  17 Mutarama 2021, abantu babiri bo mu Mujyi wa Kigali bishwe na COVID-19 mu gihe mu Rwanda hose mu bipimo 5395 habonetsemo 182 banduye iki cyorezo giterwa n’agakoko ka Coronavirus.

Ubu bwiyongere bukabije bw’iki cyorezo mu mujyi wa Kigali bwatumye abatari bake batangira gutekereza ko Inama y’abaminsitiri ishobora guterana kuri uyu wa 18 Mutarama ishobora kwemeza ingamba zihariye ku mujyi  wa Kigali mu gucubya no kugabanya ubukana bw’iki cyorezo gikomeje gukaza umurego mu gihugu cy’u Rwanda.

Inama y’abaminisitiri iheruka guterana kuwa 4 Mutarama 2020 yashyizeho icyiswe Guma mu Karere aho ingendo rusange zihuza uturere zibujijwe ndetse n’ibikorwa bihuza abantu rusange byagabanirijwe ubushobozi bw’abo byakira nkaho mu nsengero zemerewe kwakira 30% by’abo zari zisanzwe zakira.

Covid-19 yifashe ite mu mashuri y’u Rwanda!

Mu gihe hari hateganijwe ko uyu munsi kuwa Mbere tariki 18 Mutarama 2021 amashuri y’incuke n’icyiciro cya mbere mu mashuri abanza bagombaga gutangira amasomo yabo, ninako byagenze mu gihugu hose uretse mu mujyi wa Kigali. Mu mujyi wa Kigali amashuri y’incuke , abanza n’ayisumbuye yasabwe guhagarikwa. Abanyeshuri biga baba mu bigo basabwe kuhaguma aho bazakomeza guhabwa ubufasha bwibanze bategereje amabwiriza mashya ya Minisiteri y’Uburezi ateganijwe kuvugururwa mu byumweru 2 biri imbere.

Mu kiganiro na RBA Dr. Uwamariya Valentine uyobora Minisiteri y’Uburezi mu Rwanda yavuze ko ibigo bitari mu mujyi wa Kigali, bigomba gukomeza kwiga hubahiriza ingamba zafashwe. Yanongeyeho ko mu gihe hari akandi gace k’igihugu kagaragaza ubukana bwa Covid-19 naho Minisiteri yiteguye guhita ihagarika amashuri ahakorera.

Mu bindi bikorwa bikomeje kuzahazwa na Covid-19, Kuva uwa 19 Werurwe 2020, ibikorwa byose by’utubari n’imbyidagaduro birafunze, ibi binashira mu kaga gakomeye ubukungu bw’igihugu cyane ko n’ibindi bikorwa  byagiye bihabwa umubare ntarengwa w’abakora, nk’inzego za Leta, Amasoko n’insengero.

Abanyarwanda barakomeza gushishikarizwa kubahiriza ingamba zishyirwaho mu guhangana na Covid-19.

Ildephonse Dusabe