Zakia Seddiki umugore wa Ambasaderi Luca Attanasio w’Ubutaliyani uheruka kwicirwa mu Burawasirazuba bwa Repubulika Iharanira Demokarasi ya Congo yemeje ko kugirango umugabo we yicwe byaturutse ku kagambane k’umuntu wari usanzwe aziranye n’uyu muryango.
Attanasio w’imyaka 43 y’amavuko yaguye mu gico cy’abagizi ba nabi bikekwa ko ari abarwanyi ba FDLR hamwe n’umurinzi we w’Umutaliyani, Vittorio Lacovacci w’imyaka 30 ndetse n’umushoferi we w’Umunyekongo witwa Mustafa Baguma Milambo w’imyaka 56, barasirwa mu Ntara ya Kivu y’Amajyaruguru ku wa Mbere tariki ya 22 Gashyantare 2021 ubwo bari kumwe n’imodoka z’Ishami ry’Umuryango w’Abibumbye Ryita ku Biribwa (PAM).
Kuri uyu wa Gatanu tariki ya 26 Mutarama 2021, umugore wa nyakwigendera Attanasio witwa Zakia Seddiki yemereye ikinyamakuru Il Messagero ko umugabo we yagambaniwe n’umuntu ubazi neza nubwo nta we yatunze agatoki.
Yagize ati: “Luca yambambaniwe n’umuntu wahafi utwegereye, wegereye umuryango wacu. Umuntu wari uzi aho ajya hose. Yaramugurishije kandi yaramugambaniye.”
Mu gihe uyu mugore hari abo ashinja kugambanira umugabo we, Minisitiri w’Ububanyi n’Amahanga w’u Butaliyani, Luigi Di Maio, we yasabye PAM kugaragaza ukuri binyuze mu iperereza ryihuse ifatanyije n’Umuryango w’Abibumbye (ONU) bagahabwa ibisobanuro byimbitse kandi byumvikana mu gihe ubushinjacyaha bw’u Butaliyani bwatangiye iperereza ryabwo mu kumenya uwabiciye Ambasaderi.
