Umudepite akaba n’umuyobozi w’Ishyaka Natioanl Unity Platform (NUP) Robert Kyagulanyi uzwi nka Bobi Wine, yatawe muri yombi kuri uyu wa Mbere mu Murwa Mukuru ,Kampala aho bivugwa ko yari ayoboye imyigaragambyo isaba ko abayoboke be baburiwe irengero barekurwa.
Bobi Wine uheruka gutsindwa amatora y’umukuru w’igihugu yabaye kuwa 14 Mutarama 2021, yabwiye BBC ko yafaswe ubwo yari yitabiriye imyigaragambyo y’amahoro isaba ko abayoboke b’ihuriro rye National Unity Platform bafunzwe n’ababuriwe irengero barekurwa.
Abenshi muri abo bayoboke batawe muri yombi mbere na nyuma y’amatora ya Perezida yabaye muri Mutarama uyu mwaka.
Uretse Bobi Wine watawe muri yombi, abigaragambyaga banatewe imyuka iryana mu maso kugira ngo batatane.
Bobi Wine yaherukaga gutabwa muri yombi mu Ugushyingo 2020, ibintu byateye imyigaragambyo ikomeye mu gihugu, yaguyemo abasaga 50.
