Umuhango wo gushyingura uwari perezida wa Tanzania Johon Magufuli uri kubera aho avuka i Chato mu majyaruguru ashyira uburengerazuba umujyi uri hafi y’ikiyaga cya Victoria.
Abategetsi batandukanye mu gihugu barangajwe imbere na Perezida Samia Suluhu Hassan bitabiriye uyu muhango, hamwe n’abaturage babarirwa mu bihumbi.
Uyu munsi, harasomwa misa ebyiri; iya mbere yabaye kare ku kiliziya y’iwabo aho yajyaga mu misa buri gihe uko yabaga ari i Chato, n’iya kabiri kuri Stade Magufuli iri aho hafi.
Abantu ibihumbi bitabiriye iyi ya kabiri, nyuma yayo nibwo haba umuhango wo kumushyingura mu irimbi ry’umuryango, mu muhango w’icyubahiro gihabwa umukuru w’igihugu.
BBC itangaza ko Magufuli, wari umugatulika ukomeye, azibukirwa ku bikorwa byo kurwanya ruswa, gucunga neza umutungo w’igihugu, n’imishinga minini y’ibikorwa remezo .
Ku rundi ruhande uyu mugabo wari ufite imyaka 61, azibukwa nk’utarihanganiye abatavugarumwe nawe, guhonyanga itangazamakuru ryigenga n’imiryango itegamiye kuri leta, no kudafata Covid-19 nk’icyorezo.
Muri uyu muhango, General Venance Mabeyo umugaba w’ingabo za Tanzania yavuze ko ingabo zizarinda kandi zikubaha perezida mushya nk’umugaba mukuru w’ikirenga wazo.
Abwira Perezida Samia Suluhu Hassan, Gen Mabeyo yagize ati: “Tukwijeje icyubahiro cyo hejuru, ubupfura n’ubunyangamugayo nk’imico yakomeje kuranga ingabo zacu mu kurinda, gucunga umutekano no kubaka igihugu cyacu”.
Aya ni amwe mu mafoto y’umuhango wo kumushyingura:
