Abana ba Félicien Kabuga ukurikiranyweho ibyaha bya Jenoside yakorewe Abatutsi mu 1994 batangaje ko bahangayikishijwe n’ubuzima bwe bikekwako yagambaniwe n’umwunganira mu mategeko Emmanuel Altit washyizweho n’urukiko UNIRMCT.
Mu itangazo rigenewe abanyamakuru ryasohowe mu izina ry’umuryango n’umuhungu we Donatien Nshimyumuremyi, bavuga ko bari basabye urukiko ko Altit akurwaho kubera ko yanze kubaha amakuru ajyanye na Kabuga n’uburyo ateganya gukoresha mu kumwunganira.
Baragira bati” “Turumva papa arimo gufatwa bugwate n’umwunganizi we, wanga kuvugana na we cyangwa umuryango we kandi akaba atari kumwunganira uko bikwiye”.
Emmanuel Altit avuga ko abona Kabuga wenyine ari we wamuha amabwiriza, kandi gusangira amakuru n’abo mu muryango we “binyuranyije n’amabwiriza y’ibanga” ry’umwuga, nk’uko bivugwa n’inyandiko y’urukiko.
Mu cyumweru gishize, urukiko rw’urwego rwa ONU/UN (UNIRMCT) rwasigaye ruca imanza zitarangijwe n’urukiko rwa Arusha rwategetse ko Altit akomeza kuba uwunganira Félicien Kabuga, mu gihe uyu yari yasabye kuva muri uru rubanza.
Altit yabwiye BBC ko “ntacyo yavuga” kuri icyo cyemezo cy’urukiko.
Mu mpera z’ukwezi kwa mbere, Bwana Altit yandikiye urwo rukiko asaba kwishyurwa akava muri uru rubanza kubera kutumvikana n’uwo yunganira n’umuryango we, nk’uko biri mu nyandiko ya UNIRMCT.
Altit yunganira Kabuga kuva mu mwaka ushize nyuma y’uko afatiwe mu Bufaransa akagezwa imbere y’inkiko zaho maze akoherezwa i La Haye mu Buholandi ku ishami ry’urukiko mpuzamahaga rwa Arusha.
Kabuga w’imyaka 85, nk’uko byavuzwe mu rukiko, yafatiwe mu Bufaransa muri Gicurasi 2020 nyuma y’imyaka irenga 20 yihisha ubucamanza mpuzamahanga.
