Kuri uyu wa Mbere tariki ya 12 Mata 2021, Perezida Paul Kagame aritabira inama y’iminsi ibiri igiye kwiga ku buryo Umugabane w’Afurika watangira kwikorera inkingo z’icyorezo cya COVID-19 udategereje buri gihe gukomeza kugenerwa izikorerwa ku yindi migabane.
Iyi nama irakorwa hifashishijwe ikorananabuhanga ikazageza ku munsi w’ejo tariki ya 13 Mata. Yateguwe n’Ubuyobozi bw’Umuryango w’Afurika Yunze Ubumwe (AU) ku bufatanye n’Ubuyobozi bw’Ikigo gishinzwe kugenzura no gukumira indwara muri Afurika (Africa CDC).
Mu Bakuru b’Ibihugu bitezwe muri iyo nama harimo Perezida wa Repubulika Iharanira Demokarasi ya Congo (RDC) Félix Antoine Tshisekedi Tshilombo, Perezida w’Afurika y’Epfo Matamela Cyril Ramaphosa na Perezida Macky Sall wa Senegal.
Abandi bitezweho gutanga ibiganiro muri iyo nama harimo Umuyobozi wa Komisiyo y’Umuryango w’Afurika Yunze Ubumwe (AUC) Moussa Faki Mahamat n’Umuyobozi Mukuru w’Ishami ry’Umuryango wa Afurika Yunze Ubumwe ryita ku Iterambere (AUDA-NEPAD) Dr Ibrahim Assane Mayaki.
Mu mpuguke n’abayobozi bo ku rwego mpuzamahanga haraba harimo Umuyobozi w’Ishami ry’Umuryango w’Abibumbye ryita ku Buzima Dr. Tedros A. Ghebreyesus na Dr. Ngonzi Okonjo-Iweala ukuriye Umuryango Mpuzamahanga w’Ubucuruzi (WTO) n’Umuyobozi Nshingwabikorwa w’Ishami ry’Umuryango w’Abibumbye rishinzwe kurwanya SIDA (UNAIDS) Winnie Byanyima.
Hari kandi Umunyamabanga Nshingwabikorwa wa Komisiyo y’Ubukungu y’Afurika (ECA) Dr. Vera Songwe, umuherwe akaba n’ukuriye itsinda ryihariye rigamije gushaka ibisubizo bya COVID-19 muri Afurika Strive Masiyiwa ndetse na Prof. Senait Fisseha Umuyobozi ukuriye ibikorwa mpuzmahanga mu Muryango Susan Thompson Buffet Foundation.
Ubuyobozi bwa Africa CDC bwatangaje ko rimwe mu masomo y’ingenzi Umugabane w’Afurika wigiye ku cyorezo cya COVID-19 ari uko ukeneye gushora imari ihagije mu rwego rw’ubuzima ndetse no kubaka ubushobozi bwawo bwo gushaka imiti n’inkingo wihariyeho.
Umuryango w’Afurika Yunze Ubumwe (AU) watangije gahunda yawo ijyanye no gukwirkwiza inkingo (African Vaccine Acquisition Task Team/AVATT) hagamijwe kongerera Umugabane ubushobozi bwo gukwirakwiza amamiliyoni y’inkingo wagombaga guhabwa binyuze muri gahunda y’ubufatanye mpuzamahanga COVAX imaze kugenera Afurika izisaga miliyoni 1.3 guhera muri Werurwe 2021.
Afurika iteye intambwe yo kureba uko yakwitungnyiriza inkingo mu gihe hashize igihe kinini hanengwa ubusumbane bugaragara mu itangwa n’ikwirakwizwa ry’inkingo, butuma Afurika isigara inyuma mu rugamba rwo guhangana n’iki cyorezo.
Perezida Perezida Kagame ntawema kugaragaza ko mu gihe Afurika yaba itabonye inkingo ikeneye Isi yose yajya mu kangaratete, by’umwihariko akanenga bikomeye ibihugu bikize bikorerwamo inkingo bikomeje kugaragaza ukwikubira byirengagije ko mu gihe Isi yose itarinzwe nta n’umwe wabasha kwirinda ngo bikunde.
Umuyobozi wa OMS Dr. Tedros, na we mu cyumweru gishize yanenze uburyo bubabaje inkingo zikwirakwizwamo ashimangira ko harimo ‘ubusumbane bukabije’ hagati y’ibihugu bikize n’ibikennye.
Yongeyeho ko ugereranyije mu bihugu bifite amikoro ahagije usanga hafi umuntu umwe mu bantu bane yaramaze kubona urukingo rwa COVID-19, mu gihe mu bihugu bifite amikoro make umuntu umwe mu basaga 500 ni we umaze kubona urukingo.
Binyuze muri gahunda ya COVAX byari biteganyijwe ko bitarenze ukwezi kwa Werurwe 2021, nibura hazaba hamaze gutangwa inkingo za COVID-19 zigera kuri miliyoni 100 hirya no hino ku Isi, ariko kugeza ubu ngo hamaze gutangwa izigera kuri miliyoni 38, na zo Afurika ikaba yarabonyemo izirenga miliyoni imwe gusa.
