Icyegeranyo giherutse gusohorwa na Minisiteri y’ubuzima mu Burundi kiragaragaza ko umubare w’abandura Corona Virus ugenda wiyongera kuburyo ugeze ku kigera cya 9%.
Muri rusange kuva umwaka wa 2021 watangira ngo umubare w’abandura Corona Virus muri icyo gihugu uragenda wiyongera k’uburyo handura abantu 27 ku munsi, muri abo abagera kuri 90% bagenda bayihererekanya buri munsi nkuko bitangazwa na radiyo RPA.
RPA itangaza ko mugihe mu mwaka ushize wa 2020 handuraga abantu 3 ku munsi nkuko babikura mucyegeranyo cyashyizwe ahagaragara na minisiteri y’ubuzima mu Burundi cyashyizwe ahagaragara tariki ya 16/5/2021.
Icyo cyegeranyo kigaragaza ko mu mwaka wa 2020 wabonetsemo abarwayi ba Corona Virus 1000 mugihe cy’amezi icyenda habonetse umurwayi wa mbere.
Mugihe icyo cyegeranyo kigaragaza ko mu mezi ane gusa hamaze kugaragara abanduye barenga ibihumbi bine.
Icyo cyegeranyo kiragira kiti ” Biragaragara ko Corona Virus igenda yiyongera buri munsi, kuko ku itariki ya 15/5/2021 habonetse abarwayi barenga 306 kuri uwo munsi gusa. Muri abo 216 bakaba bavurirwa mungo zabo naho abagera kuri 90 bavurirwa mubitaro bitandukanye”.
Kuva mu mwaka wa 2020 Corona Virus yagera mu Burundi hamaze kwandura abantu ibihumbi 4447, muri abo ibihumbi 3365 bangana na 83,62% bakaba baranduriye mugihugu hagati naho abagera kuri 712 bangana na 16,38% banduriye Corona Virus hanze y’u Burundi.
Mu bikigoranye nkuko icyo cyegeranyo kigaragaza n’ukugenzura imipaka harebwa abinjira n’abasohoka kugirango bakumire abafite uburwayi baza mu gihugu.
Kugeza ubu igihugu cy’u Burundi cyemera ko abantu batandatu aribo bamaze guhitanwa na Corona Virus.
Aho kandi mu Burundi haravugwa inkuru y’abaturage bo mu Ntara ya Ruyigi ihana imbibi n’igihugu cya Tanzaniya binubira ko hari abaturage bambuka umupaka badapimwe indwara ya Corona Virus.
Aba baturage bakaba bafite impungenge ko indwara ya Corona Virus ishobora kuba nyinshi mu makomine yabo, bityo bakaba basaba abategetsi babo ko bakemura icyo kibazo mu maguru mashya.
