Kayiranga Jean Baptiste ahawe inshingano zo gutoza Rayon Sports mu mikino ibiri ya Shampiyona isigaye
Kuri uyu wa gatatu nimugoroba nibwo hagiye amakuru hanze avuga ko uwari umutoza wa Rayon Sports, Guy Bukasa yayisezeyeho, avuga ko adashobora kwihangira ubuzima iyi kipe irimo.
Abenshi bakabihuza n’ubuzima iyi kipe irimo, bivugwa ko bufitanye isano n’ibura ry’amafaranga bikaba ariyo ntandaro y’umusaruro muke iyi kipe ifite muri ibi bihe.
Mu gitondo cyo kuri uyu wa gatanu, tariki ya 18 Kamena, nibwo Rayon Sports ibinyujije kuri Twitter yayo itangaje ko yahaye akazi Kayiranga Jean Baptiste n’umutoza wayo w’inzibacyuho, uzayifasha gusoza imikino ibiri ya shampiyona isigaye.
Rayon Sports kuri ubu mu mikino 5 ya shampiyona imaze gukina mu 7 igomba gukinwa n’amakipe 8 ahatanira igikombe cya shampiyona, ihagaze nabi kuko ifite amanota atanagera ku 8 mu manota 15 amaze gukinirwa.
Rayon Sports kandi ku wa gatatu w’iki cyumweru yatsinzwe na APR FC igitego 1-0 mu mukino wabereye mu Karere ka Bugesera mu mujyi wa Nyamata.
Jean Baptiste Kayiranga wahawe izi nshingano, yahesheje Rayon Sports igikombe cya shampiyona mu 2004, akaba ari n’umukinnyi w’amateka w’iyi kipe kuko yayikozemo amateka mu myaka ya za 1990.
