Umurambo wa Perezida wa mbere wa Zambia Kenneth Kaunda witabye Imana mu kwezi gushize, urashyingurwa kuri uyu wa Gatatu mu irimbi ry’intwari mu murwa Mukuru Lusaka.
Nyuma y’uko abo mu muryango wa Kenneth Kaunda bagiye mu rukiko basaba ko yashingurwa iwe ahashyinguye umugore we aho gushyingurwa mu irimbi ry’intwari, byaje kwanzurwa ko ashyingurwa kuri uyu wa Gatatu tariki ya 7 Nyakanga 2021 mu irimbi ry’intwari z’iki gihugu.
Umuhango wo gushyingura Kaunda uraba nyuma y’icyumweru umurambo we uzengurutswa mu gihugu hose, aho abaturage mu bice bitandukanye by’iki gihugu bamusezeyeho.
Kenneth Kaunda warwaniye ubwigenge bwa Zambia yitabye Imana tariki ya 17 Kamena 2021 ku myaka 97, akaba ari umwe mu bantu bagize uruhare mu kubona ubwigenge bw’ibihugu bya Afurika wari ukiriho. Yayoboye iki gihugu imyaka igera kuri 27.
