Kuri uyu wa Mbere tariki ya 18 Mata 2022, ikigo cy’itangazamakauru Big Television Network(BTN) cyemeje ko kigiye gukurikirana igitangazamakuru Ukwezi cyakoze inkuru bavuga ko ishinyagurira Nyakwigendera Celestin Ntawuyirushamaboko uherutse gupfa.
Mu itangazo ryashyizweho umukono n’umuyobozi wa BTN Ahmed Pacifique riragira riti:”Tugendeye ku nkuru yakozwe na Ukwezi TV ku rupfu rwa Celestin Ntawuyirushamaboko wari umunyamakuru wacu witabye Imana kuwa 14 Mata 2022, twizera ko iyi nkuru yakozwe hagamijwe kumushinyagurira no kumusebya kandi atakiriho mu buryo buhabanye n’amahame y’umwuga w’itangazamakuru.
Bakomeza bati”Twe nka BTN twemeje ko tugiye kurega ubuyobozi bwa Ukwezi TV mu nkiko, ndetse no kuyiregera urwego rw’abanyamakuru Bigenzura (RMC) ku bijyanye n’ubunyamwuga buke bwagaragaye mu nkuru bakoze, kandi twizeye ko ubutabera buzakora akazi kabwo.”
Mu itangazo rigenewe abanyamakuru ryashyizweho umukono n’umuyobozi wa Ukwezi Media Group Ltd Theogene Manirakiza, agaragaza impamvu 5 zirimo no kuba uvuga yavugaga akarengane yagiriwe ariwe ubyivugira , Kuba nta bitekerezo bwite by’umunyamakuru birimo ndetse no kuba uvuga ko yarenganijwe afite uburenganzira ku mitungo ya nyakwigendera kurusha BTN n’undi uwo ariwe wese kuko ari umugore we w’isezerano. Manirakiza yakomeje asaba abanyarwanda kudaha agaciro ibikubiye mu itangazo rya BTN.
Ku wa Gatandatu tariki ya 16 Mata 2022, nibwo ku Ukwezi TV hatambutse inkuru ,aho umugore witwa Nyinawabari Claudine uvuga ko ari umugore w’isezerano wa Celestin Ntawuyirushamaboko avuga ko yimwe ibyangombwa by’imitungo y’umugabo we akimara gupfa. Muri iyi nkuru Nyinawabari agaruka ku kuba yari yaratanwe abana na Celestin Ntawuyirushamaboko yemeza ko yari yarataye urugo akajya mu nshoreke.
Nyinawabari akomeza avuga ko, yigeze anabwira ibibazo yari afitanye n’umugabo we ubuyobozi bwa BTN nyuma ntibugire icyo bubikoraho.
Nyinawabari asoza iki kiganiro asaba kurenganurwa n’inzego bireba, kugirango ahabwe imitungo y’umugabo we irimo imodoka yavanye mu rugo ubwo yarutaga.
Kuri uyu wa Mbere tariki 18 Mata 2022 nibwo hateganijwe umuhango wo guherekeza Umunyamakuru Celestin Ntawuyirushamaboko.
