Mbabazi Shadia uzwi nka Shaddyboo yasangiye umunsi mukuru wa Eid al-Fitr n’abana bakomoka mu miryango itishoboye, abikora ari kumwe n’abana be, avuga ko yatangiye kubatoza umuco wo gufasha.
Uyu munyarwandakazi usanzwe azwi ku mbuga nkoranyambaga, yakoze iki gikorwa cy’urukundo kuri uyu wa Mbere tariki 02 Gicurasi 2022 ubwo Abayisilamu bizihizaga umunsi mukuru usoza igisibo gitagatafu.
Uyu munsi uzwiho kuba ari uw’ibirori ku bayisilamu n’abandi bo mu yandi madini n’amatorero, abo muri islam batumira abandi bagasangira amafunguro.
Mbabazi Shadia AKA Shaddyboo we yizihije uyu munsi ajya gusangira amafunguro n’abana bo mu miryango itishoboye.
Muri iki gikorwa cyabereye muri restaurant imwe ikorera mu mujyi wa rwagati, Shaddyboo yari kumwe n’abana be babiri b’abakobwa.
Shaddyboo usanzwe akora iki gikorwa, yavuze ko yishimira kuba ari gusangira n’aba bana baturuka mu miryango itishoboye.
Ati “Noneho by’akarusho kuba nazanye n’abana banjye kugira ngo barebereho iki gikorwa na bo bazamukane uwo mutima, ndabyishimira cyane.”
Shaddyboo ufatwa nk’umwakazi w’imbuga nkoranyambaga, akunze gukora igikorwa nk’iki cy’urukundo aho mu minsi mikuru yaba uyu w’abayisilamu ndetse n’isoza n’itangira umwaka akunze gutumira abana batishoboye bagasangira.
RWANDATRIBUNE.COM
