BREAKING: M23 yamaze kwigarurira Kibumba, umuhanda Goma-Bunagana ntukiri nyabagendwa

Umutwe w’Inyeshyamba wa M23 wamaze kwigarurira agace ka Nyundo na  Kibumba, ikaba imaze no kugota ikigo cya Gisilikare cya Rumangabo.

Imirwano irakomeje ihanganishije inyeshyamba za M23 n’ingabo za Leta (FARDC) mu gace ka Teritwari ya Rutschuru na Teritwari ya Nyiragongo.

Umurongo munini w’abarwanyi ba M23 uri kwerekeza muri Rumangabo, amakuru ahaturuka avuga ko inyeshyamba za M23 zamaze kugota ikigo cya Rumangabo n’ahitwa 3 Antenne.

Abarwanyi ba FDLR CRAP bari kuri 3 antenne bayobowe na Liyetena Gaston bahungiye mu gace ka Tongo, nk’uko isoko y’amakuru ya Rwandatribune ibyemeza.

Mu kiganiro Umunyamakuru wacu ukorera i Goma yagiranye n’Umuyobozi w’itorero ry’abaporotestanti mu gace ka Kibumba, yavuze ko muri iki gihe urusaku rw’amasasu rwahagaze, aka gace kakaba kari kugenzurwa n’inyeshyamba za M23.

Abaturage ba Kibumba bo bakomeje guhungira i Goma, mu gihe umuhanda Bunagana-Goma wamaze gufungwa n’abarwanyi ba M23.

Ubwo twandikaga iyi nkuru, imirwano yari yongeye kubura mu gace ka Cengerero na Runyoni aho abarwanyi ba M23 bari kwisuganya bashaka gufata umujyi wa Kiwanja.

Ally MWIZERWA
RWANDATRIBUNE.COM