Nyuma yuko imibare y’ubwandu bwa COVID-19 yongeye kuzamuka mu Rwanda, Minisitiri w’Ubuzima, Dr Daniel Ngamije yateguje abanyarwanda ko mu minsi iri imbere, ingamba zishobora kongera gukazwa.
Hashize amezi abiri, ingamba zo kwirinda COVID-19 zorohejwe ku buryo bugaragara aho muri Gicurasi, Guverinoma yemeje ko kwambara agapfukamunwa bitakiri itegeko ndetse n’izindi ngamba zigakurwaho.
Muri zo harimo nko kuba bitakiri ngombwa ko abantu bapimwa umuriro mu gihe baba bagiye ahahurira abantu benshi ndetse n’imibare y’abitabira ibikorwa runaka ikaba yarongerewe.
Muri uku kwezi turimo, imibare y’abari gusangwamo ubwandu bwa COVID-19, yongeye kuzamuka ndetse hakaba hari no kugaragara abari guhitanwa n’iyi ndwara barimo uwapfuye kuri uyu wa Kabiri tariki 12 Nyakanga 2022.
Minisitiri w’Ubuzima, Dr Daniel Ngamije yavuze ko uku kuzamuka kw’imibare bishobora gutuma Guverinoma ikaza ingamba zo kwirinda iyi ndwara.
Yagize ati “Nkuko musanzwe mubizi ibyemezo bifatwa n’inama ya Guverinoma ishingiye ku bimenyetso biba bigaragaza uko ubwandu buhagaze, mu minsi iri imbere hazabaho gutanga andi mabwiriza hakurikijwe uko icyorezo gihagaze n’ingamba zakongera gushyirwamo ingufu.”
Yongeye kwibutsa abaturarwanda ko iyi ndwara ya COVID-19 igihari kandi ko ikica bityo ko abantu badakwiye kwirara ahubwo bakwiye kongera gukaza ingamba zo kwirinda.
RWANDATRIBUNE.COM
