Umukozi utekera abanyeshuri wo mu Karere ka Rubavu wari wafunzwe akurikiranyweho gupfobya Jenoside nyuma yuko ahagarariye inzego za Leta mu Muhango wo Kwibuka, yafunguwe.
Amakuru y’irekurwa rya Mbarushimana Jean Claude yatangiye kuvugwa mu ijoro ryo kuri uyu wa Kabiri tariki 19 Nyakanga 2022, aho byemejwe ko yarekuwe kuri uyu wa Kabiri.
Amakuru yizewe, avuga ko Mbarushimana yarekuwe ahagana saa saba z’amanywa kuri uyu wa Kabiri tariki 19 Nyakanga 2022 nyuma yuko Urwego rw’Igihugu rw’Ubugenzacyaha rusanze ntampamvu yo gukomeza kumufunga.
Uyu mukozi utekera abanyeshuri ku ishuri ry College Inyemeramihiro mu Karere ka Rubavu, yari yatawe muri yombi tariki 12 Nyakanga we na Nyiraneza Espérance wari ushinzwe uburezi mu murenge wa Rugerero w’akarere ka Rubavu wanamutumuye muri uriya muhango wo Kwibuka wabereye muri GS Nkama.
Urwego w’Igihugu rw’Ubugenzacyaha rwabataye muri yombi rubakurikiranyweho gupfobya Jenoside Yakorewe Abatutsi.
Mbarushimana yavuze ko yishimiye kuba yarekuwe kuko iperereza ryamukozweho, basanze nta cyaha yakoze
Yagize ati “Njyewe noherejwe n’ushinzwe uburezi mu Murenge wa Rugerero, ntakindi nari gukora atari ugutumika.”
Ubuyobozi bw’inzego za Leta bwavugaga ko impamvu aba bombi bari batawe muri yombi ari uko yaba uwatumye ndetse n’uwatumwe bose batahaye agaciro uriya muhango wo Kwibuka ku Nshuro ya 28 Jenoside Yakorewe Abatutsi.
Umwe mu bayobozi yavagaga ko uyu mutetsi atagombaga kugenda ahagarariye urwego rwa Leta kuko yagombaga kubona ko ibyo yoherejwemo birenze urwego rwe, agahita abyanga.
Nyiraneza Espérance we aracyafunze aho agikorwaho iperereza kuri iki cyaha cyo gupfobya Jenoside Yakorewe Abatutsi mu gihe we mu minsi ishize yavugaga ko yatumye uriya Mbarushimana kuko azi neza ko ari Umutoza w’Intore ku rwego rw’Umurenge.
RWANDATRIBUNE.COM
