Kuri uyu wa 27 Nyakanga 2022, muri Kaminuza ya INES Ruhengeri mu karere ka Musanze habereye umuhango w’Ihererekanyabubasha hagati ya Padiri Dr Hagenimana Fabien ucyuye igihe na Padiri Dr Baribeshya Jean Bosco wahawe inshingano zo kuyobora iyi Kaminuza.
Ni Umuhango wabareye imbere ya Musenyeri wa Diyosezi ya Ruhengeri Vincent Harolimana .Umuyobozi w’Intara y’Amajyaruguru, Nyirarugero Dancille n’umuyobozi w’akerere ka Musanze Ramuli Janvier .
Uyu muhango kandi wagaragayemo abafatanyabikorwa ba INES Ruhengeri bakomoka mu bihugu by’u Butaliyani, Ubudage n’ahandi.
Abafashe ijambo bose bagarutse ku gushimira Padiri Fabien Hagenimana ucyuye igihe imirimo n’ibikorwa by’indashyikirwa yagejeje kuri INES Ruhengeri harimo inyubako nshya,kongera umubare w’abanyeshuri bo mu Rwanda no hanze yarwo,kongera Ireme ry’uburezi n’ibindi.
Mu kiganiro Padiri Fabien Hagenimana ucyuye igihe yagiranye na Rwandatribune yagize ati:”Urugendo rwanjye muri INES ndusoje neza cyane,maze imyaka 14 hano muri INES. Nashimishijwe nokubona abanyeshuri bazi ikibagenza,nababajwe n’abana bamwe baseta ibirenge mu kwiga”.Yasoje avugako mu miyoborere icya mbere ari ugukunda abo uyoboye ko ibindi ari amahirwe.
Umuyobozi Mushya wa INES Ruhengeri Dr Jean Bosco Baribeshya nawe yavuze ko aje gukomereza aho mugenzi we yari agejeje iyi Kaminuza y’ubumenyi ngiro . Padiri Baribeshya afite inshingano zo kuyobora INES muri Manda y’imyaka ine kandi yizerako izongezwa ikaba umunani nk’uko biteganijwe.
Madame Nyirarugero Dancille wari umushyitsi Mukuru yashimiye Umuyobozi ucyuye igihe imirimo myiza yakoze kugeza ubwo INES mu ruhando mpuzamahanga rwa za kaminuza ,iza ku mwanya ushimishije. Yakomeje yizeza INES Ruhengeri ko ubufasha mu gihe izaba ibukeneye.
Guverineri Nyirarugero yasabye Padiri Jean Bosco Baribeshya gushaka uko iterambere Kaminuza ahawe kuyobora yagira uruhare mu iterambere ry’intara y’Amajyaruguru,irya karere ka Musanze ndetse ni rya INES Ruhengeri ubwayo.
Yakomeje asaba Umuyobozi mushya ,Padiri Baribeshya gukora ubushakashatsi ku cyarandura indwara y’imirire mibi ihangayikishije abana bo mu Karere ka Musanze by’umwihariko Umurenge wa Musanze INES iherereyemo.
Madame Nyirarugero yashoze asaba Ubuyobozi bwa INES guhagurukira kurandura burundu ikibazo cy’abanyeshuri biga muri iyo Kaminuza bakora ubujura mu baturage bagateza umutekano muke. Asoza yifuriza Padiri mushya gutangira imirimo neza.
Elica Charlotte Mbonaruza
