Hon Bobi Wine na Kizza Besigye bagiye bahangana na Museveni mu matora y’umukuru w’Igihugu akabatsinda, bari muri Kenya nk’indorezi zizarebera uko amatora yo muri iki Gihugu azagenda.
Biteganyijwe ko Abanya-Kenya kuri uyu wa 09 Kanama baramukira mu gikorwa cy’amatora y’umukuru w’Igihugu ugomba gusimbura Uhuru Kenyatta urangije manda ze.
Indorerezi zitandukanye zamaze kugera muri iki Gihugu zirimo n’iz’umuryango uzwi nka Brenthurst Foundation.
Iri tsinda ririmo Bobi Wine na Besigye, rigizwe n’indorerezi 36 ziyobowe na Hailemariam Desalegn Boshe wahoze Minisitiri w’Intebe wa Ethiopia.
Iri tsinda kandi ririmo abandi banyapolitiki bo muri Uganda nk’Umunyamabanga Mukuru w’Ishyaka rya NUP (National Unity Platform), David Lewis Rubongoya ndetse n’Umuhuzabikorwa w’Ihuriro ry’Urubyiruko mu Nteko Ishinga amategeko, Elone Natamunya.
Dr Kizza Besigye na Bobi Wine ni bamwe mu banyapolitiki bazwi cyane muri Uganda bagiye bagaragaza guhangana cyane na Museveni mu matora y’umukuru w’Igihugu bagiye bitabira mu bihe bitandukanye ariko akababera ibamba akabatsinda.
Bombi kandi bazwiho kuba baragiye bafungwa inshuro nyinshi bazira ibikorwa byo guhangana cyane na Museveni dore ko bagendaga bateza akaduruvayo muri Uganda kubera ababashyigikiye bakunze gutera hejuru bikarangira bafunzwe.
RWANDATRIBUNE.COM
