Amagambo ya Charlote Mukankusi, komiseri ushinzwe Dipolomasi mu mutwe wa RNC, yavugiye kuri radiyo Itahuka, yatumye benshi bacika ururondogoro bemeza ko niba atari inyota y’ubutegetse y’abagize RNC, ari ubundi buryo iri gukoresha kugira ngo yongere yigarurire icyizere yatakaje mu myaka 3 ishize aho benshi mu banyamuryango bayo bayisezeyeho.
Charlotte Mukankusi yumvikanye avuga ko mu mitwe yose irwanya ubutegeti bw’u Rwanda, RNC yonyine ari yo ifite ubushobozi bwo gukemura ibibazo by’Abanyarwanda ngo kuko ari yo ifite imigabo n’imigambi ifatika.
Yagize ati “Kugira ngo Abanyarwanda babeho bafite ibyishimo, urubyiruko rubone kazi, ubumwe n’ubwiyunge bw’Abanyarwanda bubashe kugerwaho nitwe RNC twenyine dufite ubushobozi bwo kubikemura. Umuti rukumbi uri muri RNC yonyine, kuko ari twe bantu twenyine tugaragaza gahunda ifatika twateguriye kiriya gihugu. Nitwe twenyine dufite ubudasa. Ntabwo ushobora kugabura ibyo utatetse.”
Yakomejeagira ati “Twe rero iyo nkono twarayitetse, yamaze gushya kandi irateguye. Ndabizi neza ko Imana izadushigikira iyo nkono tukayigabura mu Rwanda. Dufite gahunda twateguriye kiriya gihugu.Nitwe twenyine tubishoboye kandi dufite ubwo budasa. ibyo byose turabifite twarabiteguye, ntago turi kuvuga ibitu by’Amaramasa. Dufitiye kiriya gihugu gahunda nziza.”
Ku rundi ruhande ariko hari ababona ko amagambo ya Charlotte Mukankusi ari nko kwikirigita ugaseka kuko umutwe wa RNC umaze imyaka isaga 12 warananiwe kwiyubaka ubwawo ahubwo ukaba umaze gucikamo ibice inshuro zigera kuri enye zose, aho bamwe mu bari bayigize nka Theogene rudasingwa, Gahima Gerard, Jonathan Musonera, Joseph Ngarambe, Noble Marara, Nsabimana Callixte Sankara Jean Paul Turayishimye, Tabita Gwiza, Leya Karegeya n’abandi benshi ,bayivuyemo bakishingira amashyaka yabo bapfa igitugu, kwikubira umutungo,kugambanirana byakuruye amacakubiri muri RNC.
Aha niho benshi bahera bibaza uburyo abananiwe kubaka ishyaka ryabo ritarengeje abayoboke 1000 babasha kubaka igihugu gituwe na miliyoni 12 zirenga z’abaturage.
Claude HATEGEKIMANA
RWANDATRIBUNE.COM
