Rayon Sports yasinyanye amasezerano n’umukinnyi w’umurundi uzwi nk’icyamamare cyane mu mupira w’amaguru, mu rwego rwo gukomeza kubaka ikipe ikomeye.
Ni amasezerano yasinywe kuri uyu wa 14 Nyakanga 2023, hagati ya Rayon Sports n’umukinnyi w’umurundi witwa Aruna Moussa Madjaliwa bakunze kwita Cobra.Ayo masezerano azamara igihe cy’imyaka ibiri.
Aruna Moussa Madjaliwa mu Burundi bamuhimba COBRA, ni umukinnyi wo hagati mu kibuga wakiniraga BUMAMURU yo mu Burundi yanatwaye Shampiyona y’icyo gihugu.
Aruna Moussa Madjaliwa abanzamo mu ikipe y’igihugu y’u Burundi, akaba ari mu ikipe y’abakinnyi 11 beza baranze shampiyona y’u Burundi y’umwaka 2022-2023.
Rayon Sports yakunze guhahira abakinnyi mu gihugu cy’u Burundi, kandi bikayihira, mu bakinnyi beza yagize ibaguze i Burundi harimo Kwizera Pierre uzwi nka Pierrot, Karim Nizigiyimana bita Mackenzie, Cédric Amissi (Hamisi), Shaban Hussein bita Tchabalala, Bimenyimana Bon Fils Caleb, Nahimana Shassir n’abandi.
Jessica Mukarutesi
