Ubuyobozi bw’inzego z’ibanze mu Murenge wa Muko mu Karere ka Musanze, bwagiye kwirukana umugore ushinjwa kwitwara nabi muri rubanda, busanga mu nzu ye hapfiriyemo umuturage.
Inkuru dukesha urubuga rwa RADIOTV10, ivuga ko ibi byabaye mu gitondo cyo kuri uyu wa Mbere tariki 05 Nzeri 2022 ubwo ubuyobozi bw’Umudugudu wa Kamutara mu Kagari ka Kivugiza, bwajyaga kwirukana uyu muturage.
Uyu mugore witwa Sibomana Phelomene avugwaho ko ngo asanzwe yitwara nabi kuko yicuruza akaba yaraje gutura muri uyu Mudugudu wa Kamutara, avuye mu mudugudu wo mu Kagari ka Mburabuturo.
Yari yaraye acumbikiye umugore mugenzi we witwa Ntirenganya Angelique, ubwo ubuyobozi bwageraga iwe, bwasanze hakinze, busanga adahari.
Ubuyobozi bwakinguye urugi bugeze mu nzu busanga uyu wari wacumbikiwe, yitabye Imana, buhita bujya gushakisha uwamucumbikiye.
Inzego z’ibanze zivuga ko uyu muturage yaje avuga ko yari yaramukiye mu kazi ariko hari andi makuru avuga ko yari yagiye kunywa inzoga.
Urwego rw’Igihugu rw’Ubugenzacyaha RIB rwihutiye kugera aha, ruhita rujyana umubiri wa nyakwigendera ku Bitaro bya Ruhengeri kugira ngo ukorerwe isuzuma.
RWANDATRIBUNE.COM
