Guverinoma y’Inzibacyuho muri Niger yatangaje ko yaburijemo umugambi w’uwahoze ari Perezida w’iki gihugu uheruka guhirikwa k’ubutegetsi, Mohamed Bazoum, wageragezaga gutoroka n’umuryango we aho yari afungiwe iwe mu rugo.
Amakuru yatangajwe avuga ko Bazoum yagerageje gutorokana n’umuryango we, abatetsi be n’abamucungiye umutekano batanga amakuru nk’uko byatangajwe n’umuvugizi w’igisirikare cya Niger
BBC yatangaje ko byari biteganyijwe ko bahunga bifashishije kajugujugu ariko umugambi wabo uburizwamo.
Kuva yahirikwa k’ubutegetsi muri Nyakanga 2023, Mohamed Bazoum, afungiwe mu nzu iwe.
Umuvugizi w’Igisirikare cya Niger, Amadou Abdramane, yavugiye kuri Televiziyo y’igihugu ko gahunda yo kugerageza gucika yabaye mu rukerera ahangana saa cyenda z’igitondo.
Yakomeje agira ati “Uwahoze ari Perezida Mohamed Bazoum ari kumwe n’umurwango we, abamutegurira amafunguro babiri ndetse na babiri bo mu nzego z’umutekano yagerageje gucika aho yari afungiye. Abagize uruhare mu gucura uwo mugambi n’abawugizemo uruhare bamaze gufatwa.”
Uyu muvugizi yavuze ko amakuru ahari ari uko bashakaga guhungira muri Nigeria.
Kugeza ubu ntibiramenyekana aho abafashwe bagerageza gutoroka bafungiwe mu gihe igisirikare kivuga ko iperereza rigikomeje.
Uwineza Adeline
Rwandatribune. Com
