Umuhanzi Koffi Olomide yatangaje ko kugeza ubu atumva impamvu yatumye ikipe y’iwabo muri DR Congo TP Mazembe yanze kwambara imyenda iriho ibirango bya Visit Rwanda nyuma y’amasezerano u Rwanda rwagiranye na CAF.
Koffi Olomide yavuze ko ibi bakoze abifata nko kuba igihugu cye n’abaturage bacyo bafite ipfunwe k’u Rwanda.
Leta y’u Rwanda binyuze mu Rwego rw’Igihugu rw’Iterambere (RDB), basinyanye amasezerano y’ubufatanye n’Impuzamashyirahamwe y’umupira w’amaguru muri Afurika (CAF).
Bimwe mu bikubiye muri aya masezerano ni uko amakipe yose azitabira aya marushanwa ku myambaro yayo azaba yambayeho ‘Visit Rwanda’ mu gihe kompanyi y’indege y’u Rwanda ya Rwanda Air izajya itwara amakipe ari mu cyerekezo ikoreramo ingendo.
Hamaze igihe umubano w’u Rwanda na repubulika ya Demokarasi ya Congo utifashe neza kubera gushinjanya hagati y’ibihugu byombi kimwe gufasha umutwe w’inyeshyamba urwanya ikindi gihugu,aho congo ishinja u Rwanda gufasha umutwe wa M23 u Rwanda narwo rugashinja RDC gufasha umutwe w’iterabwoba wa FDRL.
Abahanga mu byerekeranye n’imikino n’imyidagaduro cyane umupira w’amaguru bemeza ko uyu mukino ushobora kugira uruhare mugukemura amakimbirane .
Mucunguzi obed
