Umuhanzi Moussa Sandiana Kaba uzwi nka Grand P ubana n’ubumuga bw’Indeshyo wamamaye ubwo yakundanaga n’umukobwa w’Ubunini budasanzwe yakiriwe na Perezida wa Guinea ,Colonel Mamadou Doumbouya mu ngoro ye iri mu murwa mukuru Conakry.
Ibiro bya Perezida wa Guinea ari naho uyu muhanzi akomoka, byavuze ko Perezida Doumbouya yatumiye uyu mugabo usanzwe ari icyamamare muri Afurika amushimira uruhare agira mu kumenyekanisha Guinea ku ruhando mpuzamahanga.
Col Doumbouya kandi yahaye Grand P inshingano zo kuba Ambasaderi w’umuco w’Igihugu cye anaboneraho guhita amushyikiriza urupapuro rw’Inzira (Passport) rw’aba Dipolomate, rusanzwe ruhabwa abahagarariye iki gihugu mu mahanga.
Perezida Doumbouya avuga ko uyu mugabo usanzwe abana n’ubumuga bw’Indeshyo umurava yagize yirengagije abamucaga intege akabasha kwimenyekanisha ku rwego ariho ubu ari igihamya kigaragaza ko inshingano yamushinze azazishobora.
Grand P yatangiye gukuza izina ubwo yakundanaga n’umunyamideli ukomoka muri Cote d’Ivoire, Euxodie Yao.Abantu benshi bakomeje gutangarira ugutinyuka uyu musore w’Imyaka 32 byagaragaraga ko yigerejeho, ubwo yakundanaga n’umukobwa ufite ubunini bukubye kane ubwe.
