Muri Repubulika ya Demokarasi ya Congo hateganijwe amatora y’umukuru w’igihugu ndetse aya matora akaba yariyamamaje mo abakandida bagera kuri 20, cyakora Delly Sesanga we akaba yamaze gutangaza ko amajwi y’abayoboke be yayeguriye Moïse Katumbi.
Aya matora ateganijwe kuba kuwa 20 Ukuboza 2023, akomeje kugaragaramo ihangana rikomeye hagati ya Perezida Felix Thisekedi na Moïse Katumbi , kuburyo usanga abandi bakiri hasi rwose ndetse ukaba utanatinya kuvuga ko abandi basa n’aho batavugwa.
Ibi Delly Sesanga yabitangaje kuri uyu 03 Ukuboza 2023, ibi kandi bibaye mugihe habura iminsi 16 gusa ngo Amatora nyirizina abe. Aje akurikira Matata Mponyo, wahoze ari Minisitiri w’intebe muri RDC igihe cya Perezida Joseph Kabila, nawe uheruka kwiyunga kuri Katumbi Moïse.
Delly Sesanga mu Matora y’ubushize yo mu mwaka w’2018 yari mubari bashyigikiye cyane perezida Félix Tshisekedi. Uyu Delly Sesanga asanzwe abarizwa mu ishyaka rya Envol, akaba yari umudepite kuva mu Mwaka w’ 2006. Igihe cya perezida Félix Antoine Tshisekedi, mu mwaka w’2018 yatorewe kuba Depite k’urwego rw’i Ntara muri Kananga.
Biravugwa ko Moïse Katumbi ariwe uyoboye uru rutonde rw’Abiyamamaza ndetse bikanavugwa ko ashobora no kuba ariwe wegukana uyu mwanya nk’uko bikunze kugaragara aho aba yagiye kwiyamamariza.
Byagaragaye neza kandi ubwo uyu mu Kandida yazaga kwiyamamariza muri Bukavu, ndetse na Kalemie ubwo yafatwaga nk’umwami naho Perezida Tshisekedi aho yagiye bamushinja kutagira icyo akora mu gihe amaze kubutegetsi.
Yves Umuhoza
Rwandatribune.com
