Abarwanyi bo mu mutwe wa Wazalendo barwana ku ruhande rw’ingabo za Congo (FARDC) baratangaza ko intambara bahanganyemo na M23 izaba ndende cyane kurusha uko byari byitezwe.
Birashoboka ko babivuga bakurikije uko urugamba ruri kugenda aho M23 ikomeje kubabera ibamba mu bice bitandukanye aho bagerageje kurwana nayo.
Ibi babitangaje mu itangazo bashyize hanze ryasinyweho n’ababahagarariye ryo gushyigikira umukandida Felix Tshisekedi wiyamamariza kongera kuyobora Congo muri manda ya kabiri.
Bagize bati: “Turahamagarira abakongomani gutegurira imitima yabo kwirwanaho, iyi ntambara idakwiye twazaniwe n’abagome izamara igihe kirekire kandi izavugwa cyane, nk’uko byari byaravuzwe na nyakwigendera Muzehe Laurent Desire Kabila. Na Patrice Emery Lumumba yari yarabivuze ko ntacyo tuzageraho nk’abaturage nitutaba indwanyi.”
Muri iri tangazo berekana ko Tshisekedi ariwe uje gukosora amakosa yakozwe n’ubuyobozi bwabanje, bakamushimira ko yashimye ubutwari bwa Wazalendo, bakanakangurira abakongomani kuzamuhundagazaho amajwi menshi mu matora ateganyijwe tariki 20 Ukuboza 2023.
