Ishyirahamwe ry’umupira w’amaguru muri Turukiya ryahagaritse shampiyona nyuma y’umukino wa shampiyona mu cyiciro cya mbere wabayemo amakimbirane yakubitiwemo umusifuzi kuri uyu wa mbere.
Umusifuzi Halil Umut Meler yakubiswe na Perezida w’ikipe ya MKE Ankaragucu witwa Faruk Koca, winjiye mu kibuga yiruka nyuma y’aho ikipe ye yari itsinzwe igitego cyo ku munota wa 97 bikayiviramo kunganya igitego 1-1 na Caykur Rizespor muri Super Lig.
Nk’uko BBC ibitangaza, umuyobozi w’ishyirahamwe ry’umupira w’amaguru muri Turkiya { TFF} Mehmet Buyukeksi yabwiye abanyamakuru ati: “Imikino muri shampiyona zose yasubitswe igihe kitazwi.”
Umusifuzi Meler yakubiswe inshuro nyinshi n’abandi bantu ubwo yari aryamye hasi bimuviramo gukomereka harimo kuvunika igufwa byoroheje. Ibyabaye byakuruye akajagari hagati y’abakinnyi n’abayobozi b’amakipe.
Ministre w’ubutegetsi bw’igihugu wa Turkiya, Ali Yerlikaya, yatangaje ko uwarwanye azakurikiranwa n’inkiko.
Yerlikaya yongeyeho ko abandi batawe muri yombi kubera uruhare bagize muri iki gikorwa kibi, cyurugomo”yamaganye cyane”.
Meler w’imyaka 37, ni umwe mu basifuzi bakomeye ba Turukiya kandi ayobora imikino mpuzamahanga ya Fifa. Ari no ku rutonde rw’abasifuzi bakomeye ba UEFA.
Yasabye kuvurirwa mu bitaro ndetse n’umuganga mukuru w’ibitaro yavuriwemo, Dr Mehmet Yorubulut, yagize ati: “Kugeza ubu ntabwo ashobora kubura ubuzima.Yavuye amaraso ku jisho ry’ibumoso anavunika igufwa gato’’.
Turakomeza gukurikirana umusifuzi kugeza mu gitondo kubera ihungabana ryo mutwe yagize. Tuzamusohora mu bitaro nyuma y’ibizamini bikenewe mu gitondo.
Perezida wa Turukiya, Recep Tayyip Erdogan,yavuze kuri uru rugomo ati: “Namaganye igitero cyagabwe ku musifuzi Halil Umut Meler nyuma y’umukino wa MKE Ankaragucu na Çaykur Rizespor wakinwe kuri uyu mugoroba, kandi ndamwifuriza gukira vuba”.
UMUTESI Jessica
Rwandatribune.com
