Ku mbuga nkoranyambaga z’abiganjemo abatavugarumwe n’ubutegetsi bwa NRM na Perezida Museveni hakomeje gukwirakwizwa ifoto ya Perezida Museveni yasinziriye muri Stade ya Kasarani, ubwo umuhango w’irahira rya Perezida mushya wa Kenya Dr William Samoei Ruto wari urimbanije.
Umuhango w’irahira rya Perezida mushya wa Kenya, William Ruto na Visi Perezida we Rigathi Gachagua wabaye kuri uyu wa 13 Nzeri 2022.
Ifoto yakwirakwiye ku mbuga nkoranyambaga igaragaza Perezida wa Uganda, uri mu bitabiriye uyu muhango yasinziriye, ubwo abari muri Sitade bose barimo bakurikira imihango y’irahira rya Perezida.
Perezida Museveni uri no mu bafashe umwanya w’ijambo, yasabye Abanya-Kenya kwirinda kujya bamwinjiza mu bibazo bireba abaturage bayo.
Mu bagize icyo bavuga kuri iyi foto, benshi bavuga ko impamvu akomeje kugaragara asinzirira mu ruhame ari uko yanze kurekura ubutegetsi nk’uko bagenzi be bo muri Kenya babikora.
Uwitwa Jacob yagize ati:”Kugundira ubutegetsi si byiza! N”ubwo muvugako abaturage babakunda! Muhe abato bakomereze aho mugejeje. Ntamuntu kamara ubaho.”
Si ubwa mbere Perezida Museveni agaragaye asinzirira mu ruhame kuko mu mwaka ushize yagaragaye asinzirira mu nteko ishinga amategeko ubwo yakiraga indahiro z’abagize guverinoma bashya yari amaze kuvugurura.
Perezida Museveni wa Uganda, ari mu bakuru b’ibihugu barambye ku butegetsi, dore ko yabugezeho mu mwaka 1986 ahiritse ubutegetsi bwa Milton Obote.
