Uwahoze ari Perezida wa Komisiyo y’amatora muri Repubulika Iharanira Demokarasi ya Congo Corneille Nangaa, yamaze kwihuza n’imitwe irimo M23 bashinga ihuriro bise Alliance Fleuve Congo (AFC).
Iri huriro ngo rigamije kugarura amahoro n’umutekano muri Congo, cyane cyane haherewe ku gushakira umuti ibibazo biri mu burasirazuba bw’icyo gihugu.
Iki gikorwa cyo gushinga ihuriro cyabereye i Nairobi muri Kenya cyitabirwa n’abarimo Nangaa umaze igihe anenga ubutegetsi bwa Perezida Félix Antoine Tshisekedi, hariyo Kandi na Bertrand Bisimwa ukuriye ishami rya Politiki rya M23.
Ihuriro rishya rya AFC rigizwe n’amashyaka 17 atavuga rumwe n’ubutegetsi bwa Repubulika Iharanira Demokarasi ya Congo ndetse n’imitwe yitwaje intwaro itandukanye ikorera mu burasirazuba bwa Congo. Harimo kandi impirimbanyi za Politiki zirenga 260.
