Donald Trump wahoze ari Perezida wa Leta Zunze Ubumwe za Amerika yambuwe uburenganzira bwo kongera kwiyamamariza umwanya w’Umukuru w’Igihugu mu mwaka utaha ngo kubera ko yateje imyigaragambyo.
Ni icyemezo cyafashwe n’urukiko rw’Ikirenga rwa Leta ya Colorado kuri uyu wa 19 Ukuboza 2023, aho rwemeje ko rwasanze Trump adakwiriye kwiyamamaza bitewe n’uko yateje imyigaragambyo yabereye ku ngoro y’Inteko Ishinga Amategeko mu mwaka wa 2021, ubwo hari hagiye gutangazwa uwatsinze amatora.
Iyi myigaragambyo yaranzwe n’urugomo yabaye tariki ya 6 Mutarama 2021 nyuma y’aho Trump atangaje ko atemeye ko yatsinzwe na Joe Biden, bari bahataniye umwanya w’Umukuru w’Igihugu, kuko ngo yibwe amajwi.
Uru rukiko rwatangaje ko iki cyemezo kizatangira kugira agaciro tariki ya 4 Mutarama 2024, mu gihe uruhande rwa Trump rwaba rutajuriye mbere y’uyu munsi ntarengwa.
Umuvugizi w’ibikorwa byo kwiyamamaza bya Trump, Steven Cheung, yatangaje ko icyemezo cy’uru rukiko kibogamiye ku ruhande rw’ishyaka ry’aba-Democrates rizahagararirwa na Biden mu matora y’ubutaha.
Cheung yagize ati “Batakarije icyizere ubuperezida bwa Biden none bari gukora ibishoboka byose kugira ngo babuze abatora b’Abanyamerika kumukura k’ubutegetsi mu Gushyingo gutaha.”
Iki cyemezo kireba gusa Leta ya Colorado, gitangajwe nyuma y’aho inkiko zo mu zindi Leta zirimo New Hampshire, Minnesota na Michigan zo zemeje ko Trump agomba kugumana uburenganzira bwo kwiyamamariza umwanya w’Umukuru w’Igihugu.
