Kuri iki Cyumweru tariki ya 24 Ukuboza 2023, humvikanye imirwano ikomeye hagati ya M23 n’Ingabo za Congo (FARDC), zifatanyije na Wazalendo.
Imirwano yabyukiye mu duce twa Kaluba muri Gurupoma ya Kamuronsa. Biravugwa ko indege y’igisirikare cya FARDC nayo yarashe bikomeye muri ako gace ihangana na M23. Kubera uko guhangana gukomeye abaturage benshi bahunze.
Ni mu gihe hari amakuru yari yatangiye gicicikana ko M23 yaba yageze mu Rubaya ariko twaje kumenya ko ayo makuru atari yo.
Imirwano yamaze akanya gato kandi yavuzwe I Mushebere na Bumbasha muri Gurupoma ya Bukombo hagati ya Wazalendo n’inyeshyamba za M23.
Umuvugizi wa M23, Laurence Kanyuka, yatangaje ko Guverinoma ya Kinshasa ikomeza kurenga ku gahenge kari kasabwe na Leta Zunze Ubumwe za Amerika kagombaga kurangira kuwa 28 Ukuboza 2023.
Abinyujije kuri X, Kanyuka yavuze ko guhera mu rukerera kuri iki Cyumweru, ingabo za guverinoma ya Congo n’abo bafatanyije bateye ahantu hatuwe cyane muri Kilorirwe, Mushaki, Kitshanga no mu nkengero zaho no ku birindiro byabo byose bakoresheje imbunda ziremereye, indege z’intambara, ibifaru na za drones.
Yongeyeho ko M23 ifite uburenganzira bwo kwirwanaho no kurinda abaturage b’abasivili.
