Umusirikare ukomeye wo ku rwego rwo hejuru mu gihugu cya Irani biravugwa ko yiciwe mu gitero cy’indege bikekwa ko cyakozwe na Israel muri Syria, nk’uko bitangazwa n’ibinyamakuru bya Irani.
Seyyed Razi Mousavi yari umuhanga mu bya gisirikare mw’ishami rya ki-Islam rya Irani, Islamic Revolutionary Guards Corps (IRGC), nk’uko byanditswe n’ibiro ntaramakuru bya Irani Tasnim.
Ibi biro byatangaje ko yishwe mu gitero cy’indege cyabereye mu karere kazwi nka Sayyida Zeinab kari mu burasirazuba bw’amajyaruguru ya Damascus.
Israel imaze imyaka itari mike ikora ibitero by’indege muri Syria, ku butaka ivuga ko bifitaniye isano na Irani.
Ibi bitero byakomeje gukaza umurindi mu mezi ashize inyuma y’igitero cya Hamas kuri Israel cyabaye tariki 7 z’ukwezi kwa 10.
Ingabo za Irani ziri muri Syria kuva mu minsi ya mbere y’intambara yo hagati muri Syria, aho zifasha ingabo za Perezida Bashar al-Assad mu ntambara ahanganyemo n’inyeshamba zirwanya ubutegetsi bwe.
Mousavi azwi ko yari icyegera cy’uwahoze ayoboye IRGC, Qassem Soleimani, wishwe na Leta Zunze Ubumwe za Amerika mu 2020.
Yari umwe mu bayobozi bo hejuru cyane ba IRGC bakorera muri Syria, nk’uko Tasnim ibivuga, kandi akaba yaraguze uruhare mu kugarura umubano hagati ya Irani na Syria.
Iri shami rya gisirikare rya ki-Islam rya Irani rivuga ko Israel izaryozwa ibi byaha n’ubwo igisirikare cya Israel ntacyo kiratangaza kugeza ubu, na cyane ko kidakunze no kuvuga ku bijanye n’ibitero gikora hanze y’imbibi z’igihugu.
Rafiki Karimu
Rwandatribune.com
