Muri Uganda ho mu Karere ka Jinja, haravugwa urupfu rw’abana babiri(2) baguye mu kiyaga cya Victoria ubwo bari bagiye kwoga muri kino kiyaga mu rwego rwo kwizihiza umunsi mukuru wa Noheri ku munsi wejo Tariki ya 25 Ukuboza 2023.
Nyuma y’uko bano bana baguye mu kiyaga cya Victoria hahise hatangira ubutabazi bw’ibanze bwo gushakisha imibiri yabo muri iyi mpanuka, nuko kumugoroba wo kuri uyu wa mbere Tariki ya 25 Ukuboza 2023, nibwo umubiri umwe wabashije kuboneka, maze uza gukurwamo nkuko Daily Monitor dukesha iyi nkuru ibitangaza.
Umwe mu babonye ibyabaye witwa Brian yagize ati: “Ubundi bano bana barimo koga hirya no hino ku nkombe (ku mucanga) hanyuma ni bwo umwe muri bo yagiye mu kiyaga kugira ngo yoge,akigeramo ahita aburirwa irengero, noneho mugenzi we abibonye ahita akora iyo bwabaga ngo abe yatabara mugenzi we biza kurangira nawe ahezemo.
Police yo muri ako gace yavuze ko ubwo itsinda ry’ingabo ryageraga aho ibyo byabereye, umurambo umwe wari wamaze kuvanwa mu kiyaga, bikaba byakozwe na bamwe mu baturage batuye hafi aho, gusa ngo ibikorwa byo gushakisha umubiri ukiri mu mazi biracyakomeje kugira ngo barebe ko nawo waboneka.
Schadrack NIYIBIGIRA.
Rwamdatribune.com
