Corneille Nangaa uherutse gushinga ihuriro rirwanya ubutegetsi bwa Congo ryitwa Alliance Fleuve Congo (AFC) yashyize umukono ku itangazo rye rya mbere ari ku butaka bwa congo muri Rutshuru, aho bikekwa ko ari mu bice biyobowe n’inyeshyamba za M23.
Uyu wahoze ari perezida wa komisiyo y’amatora muri Congo CENI aratangaza ko afite umugambi wo guhirika perezida wa Congo uriho ubu, Félix Tshisekedi, kugira ngo ategure amatora mashya, muri iyi nyandiko Naanga avuga ko ari kumwe n’abanyapolitiki bamwe bo muri Congo.
Mu itangazo rirerire yasohoye hari aho agira ati: “AFC itumiye imitwe ya politiki, abayobozi ba sosiyete sivile ,urubyiruko, abagore, n’abanyamuryango ba diaspora ya Congo, kugira ubutwari bwo kwifatanya nayo mu kugira uruhare mu gikorwa cyo kwirukana byihutirwa TSHILOMBO (Tshisekedi) no gutegurira hamwe amatora yumvikanyweho, akozwe mu mahoro, yizewe kandi aciye mu mucyo.”
Muri iri tangazo kandi hagaragaramo kwamagana ikoreshwa ry’ingufu mu gutatanya abigaragambya badashyigikiye Tshisekedi.
Bitangajwe nyuma y’amakuru yari yacicikanye ku mbuga nkoranyambaga zikoreshwa n’abashyigikiye ubutegetsi buriho muri Congo, yavugaga ko Corneille Nangaa yaba yarahunze igihugu cya Congo.
